Mətbuat-Monitorinq 19.07.13

Rəsmi və iqtidaryönlü qəzetlərdən yalnız “Yeni Azərbaycan” və “525-ci qəzet” bu gün işıq üzü görüb. “Yeni Azərbaycan” qəzeti bu sayında Milli Şuranın əleyhinə 4 məqalə yerləşdirib.

“Azadlıq” qəzeti ədliyyə naziri Fikrət Məmmədovun iqtidarın seçki planında yer aldığını yazaraq bunu “iqtidarın üçüncü namizədi olması” kimi şərh edir.

“Qasid” firmasının “Azadlıq” qəzetinə ödəmədiyi 45 min manat borc üzündən durum ağırlaşıb və qəzet bu gün firma önündə aksiyaya hazırlaşır. 

Güney Azərbaycan milli hərəkatının ünlü isimlərindən höccətülislam Əbdüləziz Əzimi Qədim rəsmi Tehranın  Azərbaycan hərəkatını islam əleyhinə cərəyan kimi təqdim etmək cəhdi göstərdiyini söyləyib.

Elmlər Akademiyasının yeni Neft İnstitutunun yaradılması barədə bəyanatını müxalif siyasilər “büdcəni dağıtmağa yönələn addım” kimi dəyərləndiriblər. 

Nəqliyyat nazirinin oğlu Anar Məmmədovin Türkiyədə ada alması haqda  xəbərlərlə bağlı nazir Ziya Məmmədov bunu hansı mənbənin ötürdüyünü axtarır. 

İqtisadçılar Neft Fondu vəsaitlərinin gələcək nəsillərə çatmaya biləcəyini bəyan ediblər.

“Ekspress”. Ölkə ordusunun qüdrətli olduğunu deyən dövlət başçısı İlham Əliyev “düşmənlə istənilən dildə danışa bilərik” bəyanatını səsləndirib.

İyulun 18-dən Bakının köhnə məhəllələrindən olan “Sovetski”nin söküntüsünə başlanılıb. Söküntü metronun “Nizami” stansiyasından Statistika İdarəsinə qədər  ərazini əhatə edir. 

“Exo” ekspertlərə istinadən bu gün Azərbaycanda satılan suların 50%-nin hər hansı keyfiyyət standartına cavab vermədiyini bildirir. 

Qəzetin yazdığına görə, ölkə biznesi hər il qazancının 100 mindən 500 min manatına kimi və ya öz xərclərinin 50%-ni Bakıda ofis kirayəsinə xərc edir.

Ölkə bazarında satılan uşaq oyuncaqlarının 60%-nin keyfiyyət sertifikatı yoxdur. 

“Novoe Vremya” paytaxtda yeni söküntü bumunun yaşanması ilə bağlı  “bakılılara rahatlıq yoxdur” mövqeyini ifadə edərək şəhərdə “məcburi söküntü zonasının sahəsinin genişləndiyini” bildirir. 

“Bizim yol” dövlət başçısı İlham Əliyevin  “antiazərbaycançı qüvvələr fəaliyyətlərini gücləndirib” bəyanatını “ciddi mesajların verilməsi” adlandırır.

Keçmiş baş nazir Surət Hüseynovun yaxınları ondan ölkəni tərk etməyin və seçkilər qurtarana kimi ölkəyə dönməməyin tələb olunduğu haqda açıqlama veriblər. 

Lənkəran təcridxanasında müstəntiq Mirqasım Kazımov müttəhim Şaiq Ağayevi ölümcül döyüb.

“Yeni Müsavat” nəqliyyat naziri Ziya Məmmədovun oğlunun Türkiyədə ada alması haqda xəbərin mətbuata çıxmasını “yeni prezident komandasında yer almaq istəyən  gizli əlin Z.Məmmədovu vurması” kimi şərh edir.

ABŞ Konqresində Azərbaycanla bağlı dinləmələrin əhəmiyyətli olmadığını deyən rəsmi Bakıya müxalifət lideri İsa Qəmbər “tədbir önəmsiz idisə səfir niyə orada idi?” sualını ünvanlayıb.