Mətbuat-Monitorinq 21.09.13

Rəsmi və iqtidaryönlü qəzetlər dövlət başçısı İlham Əliyevin gəmiqayırma zavodunun açılışında iştirakı, Gədəbəy rayonunun sosial inkişafına 4 milyon manat vəsait ayrılması haqda sərəncam imzalaması haqda yazırlar. 

“Azadlıq” qəzeti prezident seçkiləri mövzusunu diqqətdə saxlayır. İctimai TV-dəki debatda Milli Şuranın namizədi Cəmil Həsənlinin Əliyevlərlə bağlı açıqladığı faktların iqtidarın daxilini qarışdırdığı deyilir. Milli Şura sədri Rüstəm İbrahimbəyov İctimai TV-dəki iyrəncliyə görə iqtidarın məsuliyyət daşıdığını söyləyib. 

İqtidarın Cəmil Həsənlini debat çıxışlarından məhrum etməyə hazırlaşmasına Milli Şura “C.Həsənlini çıxışdan məhrum etmək istəyənlər cavablarını ən sərt şəkildə alacaqlar” bəyanatı səsləndirib.

Həbsdə olan keçmiş səhiyyə naziri Əli İnsanov “çağırışını qəbul edən hər kəsi” Cəmil Həsənliyə səs verməyə çağırıb. 

AXCP Qəbələ rayon təşkilatının fəalı Tehran Musayevin 25 sutka azadlıqdan məhrum olunmasını qəzet “iqtidarın “T.Musayevi seçki fəallığından məhrum etməsi” adlandırır.       

“Zerkalo” qəzeti prezident seçkilərilə bağlı sentyabrın 19-da İTV-dəki debatda qarşıdurmaları “ehtirasların gərginləşməsi” kimi dəyərləndirir. 

Həbsdə olan REAL Hərərkatının sədri İlqar Məmmədov iqtidarın “seçkilərdə İlham Əliyevi dəstəkləmək naminə azadlıq” təklifinə rədd cavabı verib.  

“Ekspress” qəzeti Tibb Universitetinin müalicə ixtisası fakultəsində təhsil haqlarının 4500 manata qaldırılmasını “hökumətin təhsil xərclərini artırması” kimi dəyərləndirir. 

“Exo” qəzeti ekspertlərə isnadən Azərbaycanda hər 1000 vətəndaşa 2,2 mənzil düşdüyünü yazaraq, orta Avropa göstəricisi ilə müqayisədə Azərbaycanda hər il 50% az mənzil tikilməsinə diqqət çəkir. 

“Novoe Vremya” qəzeti rəsmi Bakının seçki fəallığının qarşısını almaq məqsədilə siyasi fəalların həbsə alınmalarını “iqtidarın xalqın səbrini imtahana çəkməsi” adlandırır. 

“Bizim yol” qəzeti MTN tərəfindən həbsə alınan jurnalist və QHT rəhbəri Pərviz Həşimlinin ailəsinin təhdidlərə məruz qaldığını yazır. 

Milli Şuranın prezidentliyə namizədi Cəmil Həsənli Azərbaycan iqtidarını xarici dövlətlərin ölkəyə gətirdikləri yeni texnologiyalardan müxalifəti izləməkdə istifadə etməkdə günahlandırıb. 

“Yeni Müsavat” qəzeti yazır ki, rəsmi Bakı Milli Şuranın prezidentliyə namizədi Cəmil Həsənlini televiziyada çıxışdan məhrum etmək istəyir, amma bunun arxasında durmağın “ciddi çətinlik törədəcəyi”ni də bilir. 

Arxasında Ermənistandan olan azərbaycanlıların durduğunu iddia edən prezidentliyə namizəd “balıq Hafiz”ə bu bölgənin təmsilçiləri “əxlaqı, ləyaqəti ona hansısa toplumun adından danışmaq imkanı vermir, səsini kəssin” cavabı göndəriblər. 

Rəyləri soruşulan ölkə vətəndşaları prezident seçkiləri ilə bağlı “hamı bilir ki, seçkilərin nəticələri saxtalaşdşırılacaq” cavabı veriblər. 

Milli Təhlükəsizlik Nazirliyi həbsə alınan jurnalist və QHT rəhbəri Pərviz Həşimlini İrandan satış məqsədilə qaçaq yolla ölkəyə silah gətirməkdə ittiham edir. 

Keçmiş rektor Elşad Abdullayevin Hüquqlarını Müdafiə Komitəsi iqtidarı ifşa edən videomaterialların tezliklə yayılacağı anonsu verib.