Mətbuat-Monitorinq 22.12.14

Rəsmi qəzetlər ölkənin Ailə, Vergi məcəllələrinə dəyişikliklərin və prezident fərmanlarının mətnlərini ilk səhifələrdə yerləşdiriblər.  

“Azadlıq” qəzeti dövlət başçısı İlham Əliyevə qarşı qərarın hazır olmasını manjetə çıxararaq ABŞ-ın qərarı yaxın vaxtlarda elan edəcəyini bildirir.

QHT rəhbəri Anar Məmmədli Bakı təcridxanasından 13 saylı, müavini Bəşir Süleymanlı isə 2 saylı həbsxanalara köçürülüblər.   

İsveçrə hökuməti həbsdə olan jurnalist Rauf Mirqədirovun ailəsinə siyasi sığınacaq verib.

Avropa Sabitlik Təşəbbüsünün rəhbəri Gerald Knaus Azərbaycanda insan haqlarının pozulmasında Avropa Şurasını ittiham edərək rəsmi Bakıya qarşı sanksiyanın tətbiqinə çağırıb.     

İsrailin “Yerusalem Post” qəzetində “dünyanın diqqətinin İlham Əliyevin zülmkar hökumətinə yönəlməsi haqda” yazını qəzet “İsrail mediasından Əliyevə bir həftədə ikinci zərbə” kimi dəyərləndirir.

İctimai-siyasi fəalların əksəriyyətinin xuliqanlıq ittihamı ilə həbsə alınmasına qəzet “ölkəni “xuliqanlar xilas edəcək” mövqeyini ifadə edir.

Qurucusu Nəcəf bəy Nəcəfov olan “Azadlıq” qəzetinin 25 illik yubileyilə bağlı qəzetin fəaliyyətinə münasibətini ifadə edən media mənsubları və ictimai-siyasi fəallar qəzeti “yeganə azadlıq qalası” kimi dəyərləndiriblər. 

“Yeni Müsavat”  “Hafka” ləqbəli iş adamı Hafiz Məmmədovla nəqliyyat naziri Ziya Məmmədovun klanı arasında “müharibə”nin başladığı iddiasını ilk səhifəyə çıxarıb. Nazirin oğli Anar Məmmədov H.Məmmədovun imzasını saxtalaşdıraraq Fransanın “Lans” futbol klubunun sahibliyini ələ keçirib. Dekabrın sonuna kimi “Bakı” futbol klubunu, dəyəri 10 milyon manatlarla ölçülən idman bazasını təhvil verməyi tələb edir, əks halda obyektlərin dağıdılacağını bildirir.

Milli Şuranın bir il öncə Sabirabaddakı mitinqində 4 jurnalistin döyülməsilə bağlı iddianı Şirvan İnzibati-İqtisadi Məhkəməsinin hakimi Elxan Əmirəliyev “polisin hərəkətində qanunsuzluq olmaması” adı ilə rədd edib.

Kiyevdən Tbilisiyə uçan təyyarə nasazlıq üzündən İrəvanda məcburi eniş edib, salonda olan 25 azərbaycanlıya quru yolla Gürcüstana getmək təklif edilib, amma azərbaycanlılar uzun çəkən təmiri gözləyərək sonra Tbilisiyə uçublar.

Yerli ekspertlər qəzetə şərhlərində Rusiyada rublun dəyərdən düşməsi ilə bağlı Azərbaycan banklarının pul köçürmələrindən məhrum olacaqlarını bildiriblər.