Mətbuat-Monitorinq 24.09.13

Rəsmi və iqtidaryönlü qəzetlər dövlət başçısı İlham Əliyevin Quba rayonunun sosial inkişafı ilə bağlı 6 milyon manat vəsaitin ayrılması haqda sərəncamının mətnini dərc ediblər. Bundan əlavə, dövlət başçısının Avropa Milli Kitabxanaları və Avrasiya Kitabxanalar Assambleyasının nümayəndə heyətini qəbul etməsi haqda yazıblar.

“Azadlıq” qəzeti AXCP sədri Əli Kərimlinin oğlu Türkel Kərimlinin həbsini “Milli Şuranın uğurlu mitinqinin qisasının AXCP sədrindən alınması” adlandırır.

Vəkilləri bu həbsi qanunsuz hesab edirlər. Ə.Kərimli özü isə bu həbsi “özünə və ailəsinə qarşı iqtidarın siyasətinin cəngəllik qanunu ilə müəyyənləşməsi” kimi dəyərləndirir. 

Milli Şuranın prezidentliyə namizədi Cəmil Həsənli “balıq Hafiz”in prezidentliyə namizəd olmasına “Balıq Hafiz” İlham Əliyevin öz proyektidir” şərhini verib.

Dünyanın efir maqnatlarından olan CNN Milli Şuranın 22 sentyabr aksiyası ilə bağlı kadrları nümayiş etdirib. 

Həyatına təhlükə ola biləcəyilə bağlı seçki qərargahına daxil olan informasiyalardan sonra prezidentliyə namizəd Cəmil Həsənlinin mühafizəsi gücləndirilib.  

Milli Şura prezident seçkilərilə bağlı sentyabrın 29-da Gəncədə, sentyabrın 30-da Ağdaşda, oktyabrın 4-də Saatlıda, oktyabrın 5-də isə Sumqayıtda kütləvi təbliğat aksiyaları planlaşdırıb. 

“Zerkalo” Milli Şuranın prezident seçkilərilə bağlı icazəli 22 sentyabr aksiyasında insanların həbsə alınmasına “macəralarla dolu mitinq” şərhini verir.

“Ekspress” ekspertlərə istinadən kredit faizlərinin ucuzlaşmamasına “banklar kredit verməkdə maraqlı olsalar da pulun geri qayıdacağına inanmırlar” mövqeyini ifadə ediblər.

“Exo” qəzetinə şərh verən ekspertlər müəllimlərin, həkimlərin və hüquq-mühafizə orqanları əməkdaşlarının maaşlarının stress və məsuliyyət səviyyəsinə uyğun olmamasına görə bu sənətləri “dəyərləndirilməyən peşələr” adlandırır. 

“Novoe Vremya”  prezident seçkilərinin ədalətlə keçməyəcəyini “bizi nə gözləyir- seçkilər, yoxsa növbəti seçki məzhəkəsi?” mövqeyi ilə diqqətə çatdırır. 

Avropa Parlamentinin komitə sədri Elmar Brok Azərbaycandakı seçkiöncəi şəraitə “sərbəst toplaşmaq və televiziyaya azad çıxış təmin edilməyibsə seçkiöncəsi demokratik şəraitdən danışmağa belə dəyməz” mövqeyini ifadə edib.  

“Bizim yol” qəzetinə şərhində vəkil Elçin Sadıxov müdafiə etdiyi jurnalist Pərviz Həşimlinin vəkilsiz dindirilməsini “müdafiə etdiyi şəxsə işgəncə verilməsinin ehtimalları gücləndirməsi” kimi dəyərləndirib. 

“Yeni Müsavat” AXCP sədri Əli Kərimlinin oğlu Türkel Kərimlinin 25 sutka inzibati cəza almasını “AXCP sədrinin övladının bütün seçki müddətinə girov götürülməsi” kimi dəyərləndirir. 

Prezidentliyə namizəd C. Həsənlinin seçki qərargahının həmsədrləri Həsən Kərimov və Arif Hacılı obyektiv səbəblər üzündən vəzifələrini icra edə bilmədikləri üçün Gülağa Aslanlı və Gözəl Bayramova həmsədr təyin ediliblər. 

İqtidarın jurnalistlər üçün tikdiyi binaya nə zaman köçəcəkləri sualına KİV-lərə Dsətək Fondunun sədri Vüqar Səfərli “elə olub ki, bina tikilib, amma 10 il sonra təhvil alınıb” kimi qeyri-müəyyən cavab verib.