Qarabağ münaqişəsi regionunda təhlükəsizlik tövsiyələri

2013-cü il sentyabrın 13-17-də Berlində “Çətin vəziyyətləri dəf edərkən” layihəsi çərçivəsində Dağlıq Qarabağ münaqişəsi bölgəsindən ekspertlər qrupunun növbəti görüşü keçirilib.

Beynəlxalq humanitar hüquqa söykənən qrup münaqişə zonasında təhlükəsizliyin möhkəmləndirilməsi üzrə bir sıra tövsiyələr təklif edib. İşlənib hazırlanmış tövsiyələr təhlükəsizlik problemlərinin tərəflərin konsensus əldə etməyə müvəffəq olduğu aspektlərinə aiddir. Eyni zamanda, bu sənəd münaqişə zonasında təhlükəsizlik məsələlərinə hərtərəfli baxılmasına iddia etmir.

Qrup aşağıdakıları tövsiyə edir:

- Tərəfləri atəşkəs rejiminə ciddi şəkildə riayət etməyə və dinc əhali və hərbiçilər arasında qurbanlara gətirib çıxaran istənilən hərəkətlərin qarşısını almağa çağırmaq;

- Atəşkəs rejiminə riayət olunmasına vətəndaş nəzarətinin gücləndirilməsi üzrə tədbirlər işləyib hazırlamaq;

- Ksenofobiya, ədavət və zorakılıq dili təzahürlərinin istisna edilməsi üzrə tədbirlər işləyib hazırlamaq;

- Evlərini məcburi olaraq tərk etmiş bütün şəxslərin təhlükəsiz qayıdışı və / və ya onlara kompensasiyalar ödənilməsi üzrə hüquqi norma və zəmanətlərin işlənib hazırlanması üçün siyasətdən uzaq proses təşəbbüsü irəli sürmək;

- Dünyada silahsızlaşdırılmış zonalar təcrübəsini və Dağlıq Qarabağ münaqişəsində onun tətbiqi imkanlarını öyrənmək.

Bu sənəd Corc Meyson Universitetinin Münaqişələrin Təhlili və Həlli Fakultəsinin sülhyaratma təcrübəsi mərkəzinin və “İmecin” münaqişələrin transformasiyası mərkəzinin təşkilati dəstəyi ilə həyata keçirilən layihə çərçivəsində hazırlanıb. Layinə Britaniyanın Xarici İşlər və Birlik İşləri Nazirliyinin dəstəyi ilə həyata keçirilir.

Bu barədə Turan-a görüş iştirakçılarından daxil olmuş press-relizdə deyilir. Digər detallar barədə məlumat verilmir. -02D-