Mətbuat-Monitorinq 24.12.15

Rəsmi qəzetlər ölkə həyatının problemləri, devalvasiya, onun nəticələri barədə heç nə yazmırlar. Rəsmi qəzetlər dövlət başçısı İlham Əliyevin ad günü ilə bağlı irihəcmli məqalələr dərc ediblər.

“Azadlıq” qəzeti “MTN işi”lə bağlı mövzunu önə çəkib və həbslərin Səhiyyə Nazirliyinə “sıçrayacağı” barədə xəbərdarlıq edir.

Dekabrın 21-də baş vermiş devalvasiyanın nəticəsi olaraq ölkədə çörək, yumurta, siqaret, dəmiryol qiymətlərinin bahalaşdığı deyilir.   

Devalvasiya ilə bağlı dövlət başçısı İlham Əliyevin inhisarçılığa qarşı mübarizədə, gömrük və vergi sistemində maksimum şəffaflığın təmin olunacağı vədinə şübhə edən ekspertlər “buna güclü iradə lazım gəldiyini” bəyan edirlər. Həm də ekspertlər ölkədə iqtisadi liberallaşmanı təmin edəcək strukturlar olmadığını bildirirlər.

Dövlət başçısı İlham Əliyevin 2015-ci ilin yekunlarına dair çıxışında ölkə iqtisadiyyatının “uğurlu inkişafı” haqda iddialarının əsassızlığına bu ilin fevral və dekabr aylarında manatın iki dəfə devalvasiyaya uğraması, ölkənin əsas gəlir mənbəyi olan neftin 3 dəfə dəyərdən düşməsi, manatın devalvasiyası ilə xalqın həyat şəraitinin pisləşməsi göstərilir.

ABŞ Konqresində Azərbaycan iqtidarına sanksiyalar da nəzərdə tutan “Azərbaycanda Demokratiya Aktı” layihəsinin müzakirəyə çıxarılması səylərinə qarşı Mili Məclisin də alternativ sənədlə ABŞ-a qarşı çıxması “hakimiyyətdən dünyanı özünə güldürəcək addım” kimi dəyərləndirilir.

Keçmiş konsul Nahid Cəfərov Ermənistanın müharibə bəyanatları ilə Azərbaycanın daxili siyasətində yaşananlar arasında əlaqənin olduğu, hətta tərəflər arasında əlaqənin olması şübhələrini ifadə edir.   

“Ekspress”  ölkədəki iqtisadi durumdan istifadə edərək qiymətləri süni şəkildə qaldıran möhtəkirlərin cəzalandırılacaqlarını önə çəkib.

Ölkədə 15-17 manata satılan 50 kiloqramlıq un kisəsi devavasiyanın nəticəsi olaraq 25-27 manata satılır.

“Exo”  manatın dollar önündə 50% ucuzlaşması ilə vətəndaşların maliyyə institutlarına borclarının güclü şəkildə artdığını, “dollar kreditlərinin vətəndaşları məyusluğa düçar etdiyi”ni diqqət mərkəzinə çəkir.

“Novoe Vremya”  jurnalist sorğularını cavabsız qoymağa görə maliyyə cəzalarının artırılmasına “qanun qüvvəyə malik olacaq?” sualı ilə münasibət ifadə edir.

“Bizim yol”  manatın devalvasiyasının nəticəsi olaraq unun və çörəyin qiymətinin kəskin bahalaşmasını ilk səhifəyə çəkib.

Ekspert Vahid Məhərrəmov un və çərəyin qiymətinin bahalaşması ilə bağlı Taxıl Fondunda 750 min ton taxıl olduğu halda bundan istfadə edilmədiyini açıqlayıb.

İndiki ağır iqtisadi durumda gələn ilki büdcəyə nəzər salan ekspertlər gələn il idman yarışlarına 324 milyon manatın ayrıldığını, amma bunun əsaslandırılmadığını bildirirlər.

“Yeni Müsavat” dövlət başçısı İlham Əliyevin neftin dəyərdən düşməsinə, manatın devalvasiyaya uğramasına səbəb kimi “Qərblə Rusiya arasındakı dava”nı göstərməsini nə üçünsə “İlham Əliyevdən sensasion açıqlama” kimi təqdim edir.  

Ölkə müxalifətinin ünlü isimlərindən Pənah Hüseynə görə, devalvasiyanın nəticəsi olaraq ölkənin indiki gərgin durumdan çıxması “məsuliyyətin bölüşdürülməsini, məsuliyyətin bölüşdürülməsi hakimiyyətin bölüşdürülməsini tələb edir, əks halda vəziyyətdən normal çıxış yolu mümkün deyil”.

Bir ildə manatın 2 dəfə devalvasiyaya uğramasına görə Mərkəzi Bankın rəhbəri Elman Rüstəmovu məsul tutan ekspertlər onu istefaya çağırırlar.   

Devalvasiyanın ölkənin bank sisteminə baha başa gələcəyini deyən ekspertlər bankların yarısının bağlanacağı barədə xəbərdarlıq edirlər.

Jurnalist Rasim Əliyevin bu ilin avqustunda qətlə yetirilməsilə bağlı cinayət işi tamamlanıb. Adı bu qətlin təşkilatçısı kimi hallanan “Qəbələ” futbol komandasının kapitanı Cavid Hüseynovun cinayət işinin ayrı icraata götürülüb. R.Əliyevin ailəsinin vəkili Əsabəli Mustafayev bu məsələyə ciddi narazılıq bildirib.