Mətbuat-monitorinq 28.02.15

Rəsmi qəzetlər dövlət başçısı İlham Əliyevin Polşanın Azərbaycana yeni təyin edilən səfirinin etimadnaməsini qəbul etməsi haqda xəbəri, bəzi qanunlara dəyişikliklər olunması ilə bağlı fərmanların mətnlərini ilk səhifələrdə yerləşdiriblər.

“Azadlıq” qəzeti ölkədə tütün məmulatlarının 35-40% bahalaşmasına toxunaraq, bunu “siqaret mafiyasının əhalini soyması” kimi manjetə çıxarıb.

Milli Şura sədri Cəmil Həsənlinin qızının hər-hansı ağır nəticə törətməyən yol qəzasına görə il yarım cəzalandırılmasını siyasətçilər “siyasətçilə övladı vasitəsilə haqq-hesab çəkmək” kimi dəyərləndiriblər.

Hazırda həbsdə olan hüquq müdafiəçisi Leyla Yunusun, jurnalist Xədicə İsmayılın və yeri naməlum olan RATİ rəhbəri Emin Hüseynovun hələ azadlıqda ikən gizli yazışmalarının iqtidarın əlinə keçməsi, buna görə Qərbin onları ölkədən çıxara bilməməsi haqda “Yeni Müsavat” qəzetində dərc edilən məqaləyə ictimai fəallar “siyasi sifarişli məqalə” yanaşması bildiriblər.

Mərkəzi Bankın dollarla əməliyyatları dondurduğunu yazan qəzet buna görə vətəndaşların əmanətlərini götürə bilmədiklərini nəzərə çatdırır. Ekspertlər əhalinin banklardan pullarını kütləvi şəkildə geri çəkməsini ölkədə 20-30%-lik inflyasiya proqnozunun yaratdığı narahatlıq adlandırırlar.

Qəzet Böyük Britaniyanın “The Guardian”qəzetinə isnadən rəsmi Bakının Avropa Oyunlarına 6,5 milyard funt-sterlinq xərcləyəcəyini yazaraq, manatın devalvasiyası fonunda buna ironik “ac xalqın Avropa oyunları” münasibəti ifadə edir.

Nəqliyyat Nazirliyi müfəttişlərinin yenə də sürücü döyməsinə diqqət çəkən qəzet  iki gün ərzində müfəttişlər barədə hüquq-mühafizə orqnalarına 10 şikayət daxil olduğunu yazır. 

“Ekspress” qəzeti paytaxtda sürücü Şaiq Salahzadənin Nəqliyyat Nazirliyi müfəttişləri tərəfindən döyülməsini “müfəttiş qoçuluğunun davam etməsi” kimi önə çəkib.

“Bizim yol” qəzeti Vergilər Nazirliyinin “Bakı” futbol klubunun sahibi, “Hafka” ləqəbli iş adamı Hafiz Məmmədova vergidən yayınma itithamı səsləndirməsini ilk plana çəkib. 

Parlamentin komitə sədri Hadi Rəcəbli ailədə doğlulacaq ikinci qız uşağına 10 min manat veriləcəyi barədə yayılan xəbərləri təkzib edib.

“Yeni Müsavat” qəzeti Bakı şəhər meriyasının əməkdaşı Qüdrət Şükürov adlı şəxsin sürücüsunün adına “Alov qüllələri”ndə 5 milyon dollara ev almasının məmurların sərvətlərilə bağlı araşdırmalara başlamasına səbəb olması iddiasını ilk səhifəyə çıxarıb.

Qəzet Birgə İşçi Qrup üzvlərinə isnadən Novruz bayarmı ərəfəsində əfv fərmanı gözlənildiyini nəzərə çatdırır.

Ekspertlər Azərbaycanda bahalığın əsas səbəbkarı kimi inhisarçı məmurları və gömrük əməliyyatlarının qeyri-şəffaf olmasını göstəriblər.