Mətbuat və ifadə azadlığı sahəsində mənfi təmayüllər güclənir

Aprel ayından etibarən Qubada 1 mart hadisələri ilə əlaqədar həbsdə olan regional “Xəyal TV” telekanalının direktoru Vüqar Qonaqov və redaktoru Xəyal Quliyevlə bağlı heç bir istintaq hərəkəti aparılmır. Bu barədə Turana jurnalistlərin vəkili, Media Hüququ İnstitutunun direktoru Rəşid Hacılı bildirib.

Həbsdə olduqları müddət ərzində yalnız istintaqın əvvəlində DİN-in Mütəşəkkil Cinayətkarlığa qarşı Mübarizə İdarəsində onları cəmi bir dəfə dindiriblər və bir dəfə onları üzləşdiriblər. Eyni zamanda, istintaqın yekunlaşdığına dair heç bir əlamət yoxdur, deyə Hacılı bildirib.

O, jurnalistlərə qarşı ictimai asayişi pozma ittihamını cəfəngiyat sayır. Onlar İnternetdə Quba rayon icra hakimi Rauf Həbibovun yerli sakinləri təhqir etdiyini göstərən videoçarxı yaymaqda ittiham olunurlar. İstintaq iddia edir ki, jurnalistlər Həbibovun ifadələrini “montaj ediblər”. Əslində çıxışın bir hissəsindən istifadə olunub və jurnalistlər videomaterialları redaktə etmək hüququna malikdirlər.

“Materialın İnternetdə yayılmasında da qanunsuz heç nə yoxdur. Özü də bunu jurnalistlər özləri deyil, üçüncü şəxslər edib. Jurnalistlər bu materialı efirə buraxsaydılar və hətta etiraz aksiyasında iştiraka çağırsaydılar, bunda da qanunsuz heç nə olmazdı. Jurnalistləri yalnız açıq dillə icra başçısının villasını talan etməyə çağırdıqları halda ittiham etmək olardı”, deyə Hacılı əlavə edib.

Xədicə İsmayılovanın şəxsi həyatına müdaxilə faktı üzrə istintaqın gedişi ilə bağlı şərh vermək xahişinə cavabda vəkil qeyd edib ki, burada da heç bir hərəkət yoxdur. Bundan başqa, məhkəmə İsmayılovanın onun haqqında açıq-aşkar böhtan və təhqir xarakterli material dərc etmiş “Yeni Azərbaycan” qəzetinə qarşı iddiasını təmin etməyib.

Digər hökumətyönlü qəzetlərə - “İki sahil” və “Səs” qəzetlərinə qarşı da iddia qaldırılıb, lakin şikayətlərin təmin olunmasına dair heç bir məlumat yoxdur.

Bundan başqa, prokurorluq özü İsmayılovanın şəxsi həyatına müdaxiləyə yol verib.

Hacılı çap mətbuatının yayımı qurumlarının ləğv edilməsini də informasiya və ifadə azadlığı hüququnun pozulması faktı adlandırıb.

“Hakimiyyət bir yandan müxalif qəzetlərin nəşrinə mane olur, indi isə qəzet yayımı firmalarını, o cümlədən “Qasid” dövlət firmasını məhdudlaşdırır. “Qasid” köşklərinin qəzetdən başqa hər şey satan ticarət köşkləri ilə əvəz edilməsini məhz belə qiymətləndirmək lazımdır.

Bütün bunlar hakimiyyətin mətbuat və ifadə azadlığını təmin etmək üçün siyasi iradəsinin olmadığını və azadlıq sahəsində vəziyyətin pisləşməsi təmayülünün davam etdiyini göstərir, deyə Hacılı qeyd edib. -06C-