«Nardaran işi» üzrə prosesdə şahidlər onlara verilən işgəncələrdən danışıblar

 Bazar ertəsi Bakı Ağır Cinayətlər Məhkəməsində “Nardaran işi” üzrə növbəti iclas olub.

* 2015-ci il noyabrın 26-da Nardaranda keçirilən xüsusi əməliyyat zamanı ikisi polis əməkdaşı olmaqla, 6 nəfər öldürülüb. İş üzrə 70-ə yaxın şəxs məsuliyyətə cəlb olunub. Onlar əsasən “Müsəlman Birliyi” Hərəkatının üzvləri və tərəfdarlarıdır. Onlar CM-in müxtəlif maddələri  - konstitusiya quruluşunun zorla dəyişdirilməsinə cəhd, silahlı mütəşəkkil cinayətkar qrupun yaradılması və s. ittiham olunurlar.

Hazırda Bakı Ağır Cinayətlər Məhkəməsində iş üzrə ittiham olunan 18 nəfərin məhkəməsi gedir. Onların arasında AXCP sədrinin müavini Fuad Qəhrəmanlı da var. O, dövlət əleyhinə çağırışlarda, dini nifrətin qızışdırılmasında, kütləvi iğtişaşlara çağırışlarda ittiham olunur. Əslində isə F.Qəhrəmanlı özünün Facebook səhifəsində nardaranlılara müraciət edərək onları öz hüquqlarını müdafiə etməyə çağırmışdı.

İclas başlamazdan öncə müttəhim, AXCP sədrinin müavini F.Qəhrəmanlı auditoriyaya müraciət edərək qarşıdakı Aşura günü ilə əlaqədar Kərbəla hadisələrinin mahiyyətinin ictimaiyyətə “düzgün çatdırılmasının” vacibliyinə toxunub.

İclas başlayanda  “Müsəlman Birliyi” Hərəkatının sədr müavini Abbas Hüseynov deyib ki, bir neçə gün öncə onun üç qardaşını saxlayıblar. Məqsəd ona təzyiq göstərmək olub. Qardaşlar sonradan buraxılıb.

Sonra Sabunçu Rayon Polis İdarəsinin  əməkdaşı Ramin  Ələkbərov şahid və zərəçəkən kimi çıxış edib.

O deyib ki, 2015-ci il noyabrın 5-də dindarlar Sabunçu polisinin qarşısında aksiya keçirərək “Müsəlman Birliyi” Hərəkatının həbsdə olan sədr müavini Elçin Qasımovun azad olunmasını tələb ediblər. Qarşıdurma zamanı onun polis sipəri sındırılıb.

Vəkil Yalçın İmanovun “müttəhimlərdən kimsə ona daş atıbmı və onların arasında  polis sipərini sındıran şəxslərdən kimsə varmı” sualına şahid “deyə bilmərəm” cavabını verib.

Sonra 5 noyabr aksiyasında itirak etmiş Anar Əliyev şahid kimi çıxış edib. O, hazırda başqa iş üzrə həbsdədir.

A.Əliyev qeyd edib ki, dindarlar Sabunçu polisinin qarşısında toplaşaraq Elçin Qasımovun həbsinə aydınlıq gətirilməsini tələb ediblər. Onun sözlərinə görə, dindarlar polisə daş atmayıblar.

Şahidin sözlərinə görə, paytaxt polisinin rəis müavini Səhləb Bağırov polis dəstəsinə dindarları “tapdalamaq” əmri verib.

A.Əliyev deyib ki, Sabunçu polisinin rəis müavini, Şaiq adlı şəxs işgəncələr tətbiq edib.

“Talehin əleyhinə ifadələr almaq istəyirdilər. Bizim əllərimizi qandallayıb döşəməyə yıxdılar və tapdalamağa başladılar. Bir neçə nəfərin şalvarını çıxardılar. Təhqir etdilər. Ağzımızdan qan gəlirdi. Sonra bizi səhərə qədər soyuq yerdə saxladılar. Tualetə də getməyə imkan vermirdilər. Nardaran hadisələrindən sonra “bandotdel”də işgəncələr başladı. Bədənimizə cərəyan buraxırdılar. İşgəncə verənlərə Kərim Əlimərdanov başçılıq  edirdi. O deyirdi ki, əgər, Talehdən göstəriş aldığınızı deməsəniz mənim atamı gətirib onu narkotik maddə saxlamaqda ittiham edəcəklər”, - şahid bildirib.

O, vəkillərin suallarının cavabında deyib ki, Taleh Bağırzadə heç zaman çevriliş haqda danışmayıb, əksinə, insan hüquqlarının qorunmasının vacibliyini bildirib.

“Məqsədimiz Azərbaycanda həbsdə olan  demokratiyanı azad etməkdir”,  - A.Əliyev vurğulayıb.

Digər şahid, həbsdə olan Niftəli Vəliyev deyib ki, müttəhimlərdən heç kimi tanımır.

Onun sözlərinə görə, noyabrın 5-də Sabunçu polisinin qarşısında keçirilən aksiyada olub. N.Vəliyevə təklif ediblər ki, kamera önünə çıxaraq T.Bağırzadəni təhqir etsin.

“Mən razı olmadım və məni 6 il azadlıqdan məhrum etdilər”, - o deyib.

Şahid Lətif Əhmədov danışıb ki, noyabrın 5-də Sabunçu polisinin qarşısına toplaşan dindarları döyüblər, sonra həbs ediblər, işgəncə veriblər, təhqir ediblər.

Şahid Elvin Bünyadov bildirib ki, onun üzərinə silah qoyublar və kamera qarşısında T.Bağırzadəni təhqir etməsini tələb ediblər. Onun sözlərinə görə, Sabunçu polisinin rəisi saxlanılanların üzünə tüpürüb.

E.Bünyadov 6 il 2 ay müddətinə həbs olunub.

Şahid Sahil Rzayev də noyabrın 5-də saxlanılıb. Ondan İrana getməsinin səbəblərini soruşublar. O cavab verib ki, İmam Rzanın məzarını ziyarətə gedib. Polislər onu təhqir ediblər.

“Yasamal polisində Səttar Mehbalıyevin (Azərbaycan Həmkarlar İttifaqları Konfederasiyasının rəhbəri, parlamentin deputatı) oğlu İsfəndiyar Mehbalıyev mənə avtomobil, Dubaya səyahət, orada əyləncə təklif etdi. Bunun əvəzində mən Taleh Bağırzadənin əleyhinə ifadə verməliydim. Əks halda anamı və bacımı həbs edəcəkləri ilə hədələdilər. Mən dedim ki, Talehə qarşı cıxmaram. Ona görə də 15 gün Binəqədi təcridxanasında qan qusdum”,- şahid bildirib.

Proses oktyabrın 14-də davam edəcək.90С06--