Ölkə mediası nə yazır-media icmal 18.12.20

Azərbaycan və İran arasında Araz çayı üzərində tikilməli olan enerji layihələrinin gedişatı, həftəlik qapanma tətbiq edilməsinin mümkünlüyü, yeni il üçün gözlənilən əfv fərmanının yubana bilməsi, dərman bazarında bahalıq iddiası və s. məsələlər medianın aparıcı mövzuları sırasındadır.

“Azərbaycan” qəzeti “Araz çayı üzərində tikilməkdə olan iki layihə üzrə Texniki komissiyaların iclasları keçirilib” sərlövhəli məqalədə Araz çayı üzərində qurulmaqda olan enerji layhələrinin gedişatı dəyərləndirilib. 

Müəllif deyir ki, Azərbaycanla İran arasında Araz çayı üzərində tikilməkdə olan Xudafərin-Qız qalası və Ordubad - Marazad layihələri üzrə Texniki komissiyaların iclasları dekabrın 14-16-da Naxçıvanda keçirilib.

Müəllif vurğulayır ki, iclasda "Ordubad” və "Marazad” Su Elektrik Stansiyalarının (SES) tikintisi və istismarı haqqında” sazişlə tərəflərə həvalə edilmiş tapşırıqların, "Xudafərin” və "Qız Qalası” hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında” sazişin müvafiq maddələrində nəzərdə tutulmuş tədbirlərin müzakirəsi keçirilib.

İclasların əsas müzakirə mövzuları "Xudafərin” bəndində İran tərəfindən görülmüş işlər, su altında qalan Azərbaycan ərazilərinə dəyən ziyanın dəqiqləşdirilməsi və digər məsələlər olub.

Görüşlər çərçivəsində, həmçinin "Ordubad” Su Elektrik Stansiyasının tikintisi aparılan əraziyə yerində baxış keçirilib və daha sonra tikinti prosesinin sürətləndirilməsi ilə bağlı geniş müzakirələr aparılıb.

Eyni zamanda, "Marazad” SES-in tikilməsi ilə əlaqədar əməkdaşlıq imkanları ətrafında fikir mübadiləsi aparılıb və görüşlərin davam etdirilməsi planlaşdırılır.

“Yenisabah.az” saytı isə Azərbaycanda bir həftə çölə çıxmağa qadağa qoyula bilər-açıqlama” sərlövhəli məqalədə ölkədə COVİD-19 pandemiyası ilə bağlı tədbirlərin daha da sərtləşdirilə bilməsindən bəhs olunur.

Müəllif  buna səbəb kimi son vaxtlar Azərbaycanda gündəlik virusa yoluxmanın 4000-dən, ölənlərin sayının 40 nəfərdən çox olduğunu göstərir. Müəllifə görə elə bu səbəbdən də  dekabrın 14-dən yanvarın 18-dək bir neçə şəhər və rayonda sərtləşdirilmiş xüsusi karantin rejimi tətbiq edilir: “Yoluxanların sayında azalmalar müşahidə olunmasa daha sərt tədbirlərin görüləcəyi iddia edilir. Yəni aprel-may aylarındakı kimi insanların 4 gün çölə çıxmasına qadağa qoyulacağı iddia edilir”.

Tibb üzrə fəlsəfə doktoru Vasif İsmayıl bildirir ki, sərtləşdirimiş tədbirlər tətbiq edilsə nəticəsi 2 həftə sonra özünü biruzə verəcək: “Əgər həmin dövrdə yoluxanların və ölənlərin sayında azalma olmazsa insanların bir neçə gün çölə çıxmasına qadağa qoyula bilər”, - V.İsmayl bildirir.

V.İsmayıla görə, burada  söhbət maskadan düzgün istifadədən və sosial məsafəni qorumaqdan gedir.

“Modern.az” saytı isə “Yeni ildə gözlənilən əfv sərəncamı gecikəcək – səbəb” sərlövhəli məqalədə bu mümkün gecikmənin səbəbləri izah edilir.

Müəllifin deməsinə görə, bu il yeni il ərəfəsində imzalanması gözlənilən əfv fərmanı və ya amnistiya aktı pandemiya səbəbindən gecikə bilər: “Daxil olan çox sayda müraciətin yeni ilədək araşdırılması çətindir. Bu səbəbdən əfv sərəncamının, yaxud amnistiyanın növbəti ilin Novruz bayramında verilməsi gözlənilir”.

Müəllif yada salır ki, faktiki olaraq, komissiyanın iclasları keçirilməklə sonuncu əfv sərəncamı 2019-cu ilin Novruz bayramında verilib, bu səbəbdən də komissiyaya hədsiz sayda müraciətlər daxil olub: “Həmin müraciətlərin müzakirəsi və araşdırılması isə vaxt tələb edir. Hazırda komissiyanın katibliyində həmin müraciətlərlə bağlı gərgin iş gedir”.

Müəllif yada salır ki, komissiyanın 18 üzvünün indiki pandemiya şəraitində toplaşması və iclaslar keçirilməsi isə qanunvericiliyə ziddir. 

Müəllifin deməsinə görə, məlumatların kənara sızması ehtimalı əsas götürülərək iclasıların onlayn keçirilməsi nəzərdə tutulmur:

“Mediçina.az” saytı “Sahibsiz dərman bazarı: “Sistemin özü 16, vurulması 50 manat, kim sağala bilər?” reportaj” sərlövhəli məqalədə dərman bazarındakı bahalıq müzakirə olunur.

Müəllif deyir ki, son zamanların ən çox müzakirə olunan mövzularından biri koronaviruslu xəstələrin müalicə xərcləridir.

Pandemiya ilə bağlı mövcud vəiyyəti anladan müəllif deyir ki, xəstəxanalar xəstə ilə dolu, hər kəsin xəstəxanada müalicə olunmaq və dövlət vəsaiti hesabına dərmanla təmin edilmək şansı yoxdur, təcili tibbi yardım çağırıldıqdan azı bir neçə gün sonra gəlir, simptomsuz təmaslılardan test belə götürülmür: “Özəl xəstəxanalarda yaxma testin qiyməti 100 manatdan başlayır, Bir neçə poliklinikada PZR test 40 manata təklif olunsa da bu, ancaq uçuş bileti olanlara aiddir”, -müüəllif  bildirir.

Müəllif deyir ki, koronavirus dərmanlarının qiyməti ilə maraqlanmaq üçün bir neçə aptekdə olub, profilaktik xarakter daşıyan reseptin qiymətini araşdırıb:  “Bir nəfər üçün nəzərdə tutulan reseptdəki dərmanların hamısı bir aptekdə 83, digərində 87 manata hesablanıb.

Müəllif əlavə edir ki, bir sıra apteklərdə arbidol, kleksan, hətta vitamin C kimi dərmanlar belə yoxa çıxıb, dərmanlar göstərilən qiymətindən azı 2 dəfə baha,  100 manata satılır.  

Onun deməsinə görə, sistem qoşmaq üçün avadanlıq da kifayət qədər bahadır və bəzən əvvəlcədən sifariş vermək lazım gəlir. Əvvəllər evdə xəstəyə sistem vurmağın qiyməti 3-5 manat arasında dəyişirdisə, indi bu qiymət bəzən 50 manata qədər çıxır. Sistem vurulması üçün tibb bacısına verilən pul sistemin özündən 2 dəfə baha olur: “Bu da xərcə hesablanır, 10 ədəd sistemə 160 manat verən adam var ki, sistemlərin vurulmasına 500 manat verib. Kimin pulu varsa sağalar, kimin yoxdursa… Bu qiymətlərlə virusa yoluxaraq sağalmaq isə hər kəsin işi deyil”, - müəllif bildirir.