Ordunun əsas problemi indiki rəhbərliyidir

Ehtiyatda olan Zabitlər Birliyi (EOZB) çərşənbə axşamı öz ofisində “Orduda insan haqları: uğurlar, problemlər və perspektivlər” mövzusunda dinləmələr keçirib. 

Birliyin rəhbəri Yaşar Cəfərli orduda uğurların, bu uğurlarla yanaşı problemlərin də olduğunu deyib. O, sosial təminat, xüsusi şəraitdə xidmətə görə 3 qat əmək haqlarının verilməsi, mənzillə təminat sahəsində ciddi problemlər olduğunu deyib. Bu sahədə təminatların yüksək səviyyədə olmamasının əsgər ölümlərinə yol açması iddia edilib. 

Ehtiyatda olan zabit Şahmurad Məmmədov orduda sıravi heyətlə işləmək üçün müddətdən artıq hərbi xidmət etmiş hərbiçilərin (orduda bu təbəqəyə qısaca “maxe” deyilir) cəlb olunmasının özünü doğrultmadığını deyib. Belə şəxslərin əsgərlə davranışa malik savadı olmadığı üçün zorakılığı özlərinə davranış qaydası seçdiyi deyilib. Bu təbəqənin əsgərləri incitməsinin zabit heyətinə nifrətə səbəb olduğu vurğulanıb. Orduda itkilər və bu itkilərin səbəblərini aradan qaldırmaq üçün Müdafiə Nazirliyi Elmi Tədqiqat idarəsilə birgə müzakirələr təşkil olunması təklif edilib. Ordu hissələrində şəxsi heyətin mənəvi-psixoloji durumunu yüksəltmək üçün birbaşa əsgərlərlə təmasda olan zabit heyəti formalaşdırılması, psixoloq, dini ştatların bərpası, dini inanclı hərbiçilərə inancına görə təzyiq olunmaması tövsiyyə edilib. 

Zabit Daşdəmir Əliyev orduda sosial təminat, kadrlara rütbələrin verilməsi və karyera yüksəlişi sahəsində ədalətsizliklərə yol verildiyini qeyd edib. Belə ədalətsizliklərin də əsgər ölümlərinə yol açdığı deyilib. Qanunla 10 il orduda xidmət etmiş şəxslərin istəklərinə görə ordudan tərxis olunmalarına müdafiə naziri Səfər Əbiyev səviyyəsində problemlər yaradıldığı vurğulanıb. Belə zabitlər yalnız məhkəmə qərarı ilə ordudan tərxis oluna bilirlər. Cəbhə bölgəsində zabit heyətinin uzun müddət qulluq etməsi, rotasiya edilməmələri kimi halların olduğu qeyd edilib. Əsgərlərin orqanizmlərinin möhkəm olması üçün qida rasionunun dəyişdirilməsinin lazımlığı vurğulanıb. Zabitlərə yüksək pensiya təqaüdü verilməsi haqda məhkəmə qərarları olmasına baxmayaraq, nazir Səfər Əbiyevin buna maneçilk törətdiyi deyilib. Zabit Eldar Həşimovun yüksək pensiya alması ilə bağlı əlində bir neçə məhkəmə qərarı olmasına baxmayaraq, S.Əbiyevin qərarı icra etmədiyi söylənilib.  

Ordudakı neqativləri aradan qaldırmaq üçün müdafiə nazirinin, Baş Qərargah rəisinin vəzifələrindən azad olunmaları, şəxsi heyətin sosial, məişət problermlərinin həll edilməsi təklif edilib. Bundan əlavə, hərbi xidmətə qədər çağırışçıların fiziki hazırlığına xüsusi diqqət olması üçün dövlət proqramı işlənilməsi təklifi irəli sürülüb. -05-