Ötən il 2000-dən çox məhkum cəzadan azad edilib

Bakı/02.03.21/Turan:  Martın 1-də Məhkəmə-Hüquq Şurasının onlayn iclası keçirilib. Şuradan Turan-a verilən məlumata görə, iclasda Şuranın sədri, ədliyyə naziri Fikrət Məmmədov ötən ilin yekunlarından, qarşıdakı vəzifələrdən danışıb. O bildirib ki, cinayət qanunvericiliyinə yeni qanunların tətbiqilə əlaqədar məhkəmələrdə 2000-dən çox məhkum cəzadan azad edilib, 3300-dən çoxunun cəza müddəti azaldılıb.

F.Məmmədov deyib ki, korrupsiyaya şərait yaradan halların qarşısının alınması və obyektivliyin təmin olunması üçün məhkəmələrdə monitorinqlər aparılıb, 2 məhkəmə sədri, 8 hakim intizam məsuliyyətinə cəlb edilib, müxtəlif əsaslarla 16 hakimin səlahiyyətlərinə xitam verilib, Şəki Apellyasiya Məhkəməsinin 3 hakiminə töhmət verilib.

Şura sədrinin məhkumların azad olunması məsələsilə bağlı qeyd etdiyi faktlara münasibət bildirən hüquq müdafiəçisi Rəsul Cəfərov Turan-a bildirib ki, 2000-dən çox məhbusun azad edilməsini xüsusi göstərici hesab etmir, fərqli rəqəm kimi qiymətləndirmir. O bu rəqəmin ötən illərdəkinə yaxın, hətta bəzi illərə görə aşağı olduğunu qeyd edib.

“Problem ondan ibarətdir ki, vaxtından əvvəl azadlığa buraxılma ilə bağlı mexanizm tam qüvvə ilə işləmir. Ədalətli yanaşma nümayiş etdirilmir. Bizə çoxsaylı müraciətlər edilir. Bizə müraciət edən, cəza müddətinin bitməsinə bir il, hətta bir neçə ay qalan məhbuslar var ki, ağır cinayətlərə görə mühakimə edilməyiblər, nəyə görəsə azad edilmələr, cəzanın azaldılması onlardan yan keçir. Onların arasında həm siyasi, həm də qeyri-siyasi işlərə görə həbs olunanlar var. Sübutlar olmasa da əlimizdə məhkumluqdan azad edilmə zamanı rüşvət hallarına yol verilməsinə dair iddialar var”, - R.Cəfərov  deyib.

Hüquq müdafiəçisinin fikrincə, bu gün Azərbaycanda islahat aparılmalı olan ilk üç sahə varsa, onlardan biri mütləq şəkildə penitensiar xidmət olmalıdır.

Qeyd edək ki, məhkəmə hakimiyyətinin özünüidarə оrqanı оlan Məhkəmə-Hüquq Şurası  2005-ci ilin fevralından fəaliyyət göstərir. 15 nəfərdən ibarət  Şura əsasən hakimlərdən (9 nəfər), eyni zamanda hakimiyyətin digər qоllarının, eləcə də məhkəmə prоsesində tərəf оlan prоkurоrluğun və vəkilliyin nümayəndələrindən ibarətdir.—0—