Pamirin ən yüksək zirvələrinə Azərbaycan ekspedisiyası başlayıb

İyulun 25-də axşam Azərbaycanın alpinizm üzrə yığma komandasının üzvləri Sirxan Məmmədov (rəhbər), Denis Leusov və Firuz Dadaşov tranzit reyslə Moskvadan Düşənbəyə yola düşüblər. 

    Daha bir iştirakçı – ötən həftə İbn Sina (keçmiş Lenin zirvəsi – 7131 m) zirvəsini uğurla fəth edən Rüfət Qocayev ayın 27-də ekspedisiyaya qoşulacaq.

    Azərbaycan Alpinizm və Qayayadırmanma Federasiyasının prezidenti İsrafil Aşurlunun Turana verdiyi məlumata görə, ekspedisiyanın məqsədi Korjenevski (7105 m) zirvəsinə və Orta Asiyanın ən yüksək zirvəsi olan İsmail Samoni (keçmiş Kommunizm, 7495 m) zirvəsinə iki ardıcıl fəthin həyata keçirilməsindən ibarətdir.

    Qeyd edək ki, hər iki fəth ən yüksək çətinlik dərəcəsinə (5 B) aiddir. Avqust ayı ərzində alpinistlərimiz məşq və iqlimə uyğunlaşmaq məqsədilə 6500 m yüksəklikdəki buz yaylasına bir neçə çıxış həyata keçirəcəklər. Bundan sonra növbə ilə hər iki zirvəni fəth edəcəklər.

    Ekspedisiya Rusiyada Azərbaycan Gənclər Təşkilatının, Heydər Əliyev Fondunun nümayəndəliyinin və Azərbaycan Alpinizm Federasiyasının Azərbaycan tarixində məşhur insanların xatirəsinə həsr olunmuş birgə layihəsinin davamıdır. 

    Əvvəlki iki fəth Azərbaycan mədəniyyətinin məşhur nümayəndələrinin yubileylərinə - Mirzə Fətəli Axundovun 200 illiyinə və maestro Niyazinin 100 illiyinə həsr olunmuşdu.

    Ekspedisiya Azərbaycanın Gənclər və İdman Nazirliyinin dəstəyi ilə keçirilir.

    Bu gün Azərbaycanın Düşənbədəki səfirliyi yığma komandanın üzvlərini qəbul edib, onlar diplomatik missiyaya ekspedisiyanın məqsəd və vəzifələri haqqında məlumat veriblər. -02В-l