Partlayış baş vermis hərbi hissənin ətrafından indiyədək 43.883 hərbi sursat götürülüb

Bakı/24.01.18/Turan: Xızı rayonu ərazisində (Bakıdan 70 kilometr şimal) yerləşən hərbi hissənin anbarında baş vermis partlayışdan keçən 116 gün ərzində 25 532 ədəd partlamamış hərbi sursat (PHS), 18 351 ədəd partlamış-yanmış sursat qalıqları və 101 213 kq yandırma məhsulu aşkar edilərək götürülüb, nəticə etibarilə 87 058 647 kv.m (8 706 ha) ərazi yoxlanılıb. Bu barədə Azərbaycan Ərazilərinin Minalardan Təmizlənməsi üzrə Milli Agentliyin (ANAMA) məlumatında deyilir.

Rəsmi məlumata görə, 2017-ci il avqustun 27-də Müdafiə Nazirliyinin Xızı rayonu ərazisindəki hərbi hissəsində naməlum səbəbdən baş vermiş yanğın nəticəsində həmin hərbi hissənin utilləşmə üçün hazırlanmış silah-sursat anbarında partlayışlar baş verib.

Hadisə ilə bağlı Hərbi Prokurorluqda Cinayət Məcəlləsinin 223.2 (partlayış təhlükəli obyektlərdə təhlükəsizlik qaydalarını pozma ağır nəticələrə səbəb olduqda) və 342.2-ci (qulluğa səhlənkar yanaşma ağır nəticələrə səbəb olduqda) maddələri ilə cinayət işi başlanıb, istintaq davam etdirilir.

Agentlik bildirir ki, bu il yanvarın 23-də partlayış baş vermiş hərbi hissənin ətrafına baxış davam etdirilib, 81 ədəd partlamamış hərbi sursat (PHS), 298 ədəd partlamış-yanmış mərmi qalıqları və 526 kq. yandırma məhsulu aşkar edilərək götürülüb, nəticə etibarilə 3 736 803 kv.m (373.68 ha) ərazi yoxlanılıb.

Ümumiyyətlə, agentlik 116 gün ərzində 12 ev, 46 evin həyətyanı sahəsinə, 16 ferma ərazisinə, 45 əkin sahəsinə, 13 otlaq sahəsinə, 2 məktəb ərazisinə, 3 dəmir yolu xəttinə, 1 rabitə qovşağına, 1 telestudio ərazisinə, 2 kənd qəbiristanlığına, 1 su kanalına, 1 istixanaya, 1 hərbi şəhərciyə, 1 kənd məscidinin yaxınlığına, su stansiyasına, Bakı-Novorossiysk neft kəmərinin və Bakı-Rostov dəmir yolu xəttinin Xızı rayonundan keçən hissəsinə, neft quyusunun ətrafına, balıqçılıq və zeytunçuluq təsərrüfatına, eko-turizmin həyətyanı sahəsinə, dəniz sahilinə, taxıl anbarının yaxınlığına, yol kənarına, Samur-Abşeron kanalı istismar idarəsinin Taxta körpü-Ceyranbatan kanalının içərisinə, ətrafına, dükerlərə, 6 saylı Yaşıllaşdırma İdarəsinin ərazisinə baxış keçirib. -03D-