Polis, yoxsa Gestapo?

Bakı/09.06.20/Turan: İyunun 8-də Yeni Yasamal yaşayış massivində vətəndaşlara qarşı amansız polis əməliyyatının dəhşətli təfərrüatları polis tərəfindən kütləvi cinayətin baş verdiyini,  onun təşkilatçıları və icraçılarının bu cinayətləri qəsdən törətdiklərindən xəbər verir.

Saatlarla döyüldükdən sonra iyunun 9-da azad edilən Kərim Süleymanlı jurnalistlərə bildirib ki, iyunun 8-də səhər tezdən onu Yasamal rayonundakı 29-cu polis bölməsinə aparıblar.

“30 nəfər 5 saat məni döydü. Bildirdim ki, ağciyərimdən əməliyyat olunmuşam və onlar  partlaya bilər, yenə də döydülər. Təpik, yumruqla vururdular. Nalayiq sözlər dedilər Üzüm-gözüm pis gündədir”, -  K.Süleymanlı deyib, başında və üzündəki qançır, sıyrılmanı göstərib.

Onun sözlərinə görə, saxlanılan 10 qonşu da amansız işgəncələrə məruz qalıb.

“Hamımızı dəfələrlə döydülər. Axşam məhkəmə bizi 15 sutka həbs etdi. Məni inzibati həbs olunanların saxlanılma məntəqəsinə apardılar. Orada məni qəbul etmədilər ki, qızdırmam yüksəkdir,ona görə qaytardılar bölməyə və səhərə qədər orada saxladılar. Sonra şöbə rəisi üzr istədi və məni bursxdılar”, - zərərçəkən danışıb.

K.Süleymanlı deyib ki,  aldığı zədələri təsdiqlətmək üçün məhkəmə ekspertizası keçiriləcək.

“Prezidentdən, birinci vitse-prezidentdən və daxili işlər nazirindən xahiş edirəm ki, baş verənlər araşdırılsın”, - o deyib..

Zərəçəkənin vəkili Cavad Cavadov “Azadlıq”  radiosuna bildirib ki, ekspertizadan sonra şikayət Baş Prokurorluğa göndəriləcək. -0-