Prokuror jurnalist Elçin Həsənovun cəzasını sərtləşdirməyi tələb edir

Prokuror xuliqanlıq ittihamı ilə 1 il islah işlərinə məhkum edilmiş jurnalist Elçin Həsənov barəsində hökmə etiraz edib. İttiham tərəfi Həsənovun 3,5 il müddətinə azadlıqdan məhrum edilməsini tələb edir. Öz növbəsində, vəkil Fariz Namazlı hökmdən apellyasiya şikayəti verərək, Həsənova bəraət verilməsini xahiş edir. Namazlı Turan-ın müxbiri ilə söhbətində bildirib ki, Bakı Apellyasiya Məhkəməsində işə gələn ay baxılacaq.

Maraqlıdır ki, prokuror etirazı iyunun 21-də - bu prosessual hərəkət üçün ayrılmış 20 günlük müddətin sonuncu günündə verib.

* Cinayət işi il yarım əvvəl baş vermiş insidentlə bağlıdır. Həmin vaxt Həsənov özü “Asiya” agentliyinin keçmiş rəhbəri Cəfər Cəfərov tərəfindən hücuma məruz qalıb (Sonuncu hazırda rüşvət tələb etmə ittihamı ilə istintaq altındadır). Hadisədən sonra Həsənov şikayətlə polisə müraciət edib. Bir müddət sonra Cəfərov həbs olunub, amma Həsənovun şikayəti ilə deyil, rüşvət tələb etmə faktları ilə əlaqədar. Lakin bu ilin martında Həsənovun özünə qarşı cinayət işi açılıb. Həsənov hesab edir ki, o, jurnalist və müxalif fəaliyyətinə görə təqib olunur. O, Sumqayıtın “Yüksəliş naminə” internet qəzetinin (yukselis.info) redaktor müavinidir. Bundan başqa, AXCP Ali Məclisinin üzvü və “Sumqayıt gənclərinin hüquqi maarifləndirilməsi” QHT-nin sədr müavinidir. Həsənova qarşı cinayət işinin başlaması onun orduda korrupsiya və mənimsəmə mövzusunda nəşrləri ilə eyni vaxta təsadüf edib. -06B-