Prokurorluq Gülər Əhmədovanın polis nəzarətində olduğunu bildirib

 Baş Prokurorluq keçmiş millət vəkili  Gülər Əhmədovanın barəsində seçilmiş həbs qətimkan tədbiri - polisin nəzarətinə verilmə ilə bağlı məlumatı təsdiqləyib. 

O, Azərbaycan Beynəlxalq Universitetinin keçmiş rektoru Elşad Abdullayevin açıqladığı videogörüntülərlə bağlı qaldırılan cinayət işi üzrə ittiham olunan şəxs kimi 

istintaqa cəlb olunub. Videoyazıda E.Abdullayevin G.Əhmədova ilə söhbəti yer alıb. Söhbət zamanı birincinin 2005-ci il parlament seçkilərində deputat seçilməsi üçün rüşvətin məbləği müzakirə olunub.

Videogörüntü yayımlandıqdan sonra Bakı Şəhər Prokurorluğu CM-in 178.3.2 maddəsi (inamdan istifadə etmək yolu ilə başqasının iri məbləğdə əmlakını mənimsəməklə dələduzluq törətmək) cinayət işi qaldırıb.

Baş Prokurorluğun mətbuat xidmətinin rəhbəri Eldar Sultanov məlumatla bağlı ətraflı şərh verməyib. Onun sözlərinə görə, istintaqın gedişi barədə ictimaiyyətə əlavə məlumat veriləcək.

Öz növbəsində  vəkil Xalid Bağırov  həbs qətimkan tədbirinin – polisin nəzarətinə verilmə - mahiyyətini Turan-a açıqlayaraq bildirib ki, bu məsələ Cinayət Prosessual Məcəllənin 169-cu  maddəsi ilə tənzimlənir. Bu, maddəyə görə, təqsirləndirilən şəxs mütəmadi olaraq polis nəzarətində olur, polis istənilən vaxt onu yoxlaya bilər. Eyni zamanda  təqsirləndirilən şəxs müstəntiqin, prokurorun və ya hakimin icazəsi olmadan daimi yaşayış yerini dəyişə bilməz.-16B06-