Auditorlar lisenziyasını uzatmağa tələsmir

Azərbaycan Auditorlar Palatasının üzvləri peşəkar fəaliyyət üçün lisenziyasını uzatmağa tələsmir. 

Qurumun saytının verdiyi məlumata görə, sonuncu attestasiyaya (birinci pillə) 6 ərizə verilib, imtahana 2 nəfər gəlib – Nərgiz Kərimova və Səməd İsgəndərov. Onalr 100 mümkün baldan 82 bal toplayıb. Qalan 4 nəfər gözləmək qərarına gəlib. 

Bu iddiaçılar Naib Yusifovla birgə attestasiyanın ikinci pilləsini də keçiblər və 10 baldan 8-i toplayıblar. 

Bu il Palatanın planlarında  attestasiya ilə yanaşı, kurs və ezamiyyələr, auditor şirkətləri və 15 müstəqil auditorun yoxlanması da var. 

Auditin şəffaflığının tənzimlənməsi və təmin edilməsi idarəsinin rəhbəri Maarif Abbasov Turan-a deyib ki, plan üzrə yoxlamalar (ayda 1 dəfə) "Premium Audit", "Forum", "Inter Audit", "Kaspian Konsaltinq", "Alfa-Audit", "Caspian Business Consultants" şirkətlərində keçiriləcək. "Moore Stephens Azerbaijan Limited", "Tax, Audit & Konsaltinq Servis", "RM Audit", "KPMG Azerbaycan Limited" və başqaları da yoxlanacaq. 

Azərbaycan Auditorlar Palatası 1996-cı ildən fəaliyyət göstərir və ölkədə auditor fəaliyyətini tənzimləyir. 

Hazırda Azərbaycanda 53 auditor təşkilatı, 44 müstəqil auditor və 28 assosiativ üzv bu fəaliyyəti həyata keçirmək hüququna mailkdir. --17D—