Qamət Süleymanov Azərbaycan daxilində radikal dini qrupların həmfikirlərinin olduğunu bildirir

     Bu ilin aprel- may aylarında MTN-in apardığı əməliyyatlarda saxlanılan şəxslər radikal dini qrupların təmsilçiləridir. Fəaliyyəti 2008-ci ildən məhdudlaşdırılan  “Əbubəkr” məscidi icmasının imamı Qamət Süleymanov Turan-a bildirib. 

  O, bu qrupların Azərbaycanda da həmfikirllərinin olduqlarını deyib. Amma ölkə içində zəif olduqları üçün əməli addımlar ata bilmədiklərini sölyəyib. “Onlar xaricdən dəstək ala bilmədikləri halda ölkə daxilində hərəkətə keçə bilməyəcklər”-Q.Süleymanov qeyd edib. O, bu radikal qrupların Avropa, Yaxın Şərq, Azərbaycana yaxın ölkələrdə mərkəzi olduqlarını, amma Azərbaycanda belə mərkəzə sahib olmadıqlarını vurğulayıb.

  Onun fikrincə, bu radikal qruplar əməli fəaliyyət göstərə bilmək üçün ilk növbədə Şimali Qafqazdakı mərkəzlə əlaqə saxlayırlar. Belə ki, özünü “Qafqaz Əmirliyi” adlandıran qurum postsovet müsəlman ölkələrində islamı müdafiə” işini öz üzərinə götürüb. 

  Belə ki, radikal dini qruplar Şimali Qafqazdakı mərkəzin saytından istifadə edir, bu sayt vasitəsilə bir tərəfdən gənclər təsir altına salınır, digər tərəfdən isə ayrı-ayrı yerlərdə terror fəaliyyətləri əlaqələndirilir. “Bu məsələnin ən pis tərəfi odur ki, bütün bu anti-insani əməllər din adı altında reallaşdırılır”, -Q.Süleymanov nəzərə çatdırıb. 

  İcmanın fəaliyyətinə gəlincə, Q.Süleymanov bildirib ki, 2008-ci ilin avqustunda “Əbubəkr” məscidi icmasına qarşı törədilən teraktdan sonra məhdud şəkildə fəaliyyət göstərirlər. O, həmin teraktda bir neçə adamın həlak olduğunu, özü də daxil olmaqla, 30-a yaxın adamln ciddi xəsarət aldığını xatırladıb.

  İcmanın tam fəaliyyətli üçün dəfələrlə aidiyyatı qurumlara müraciət etsələr də, buna nail ola bilməyiblər. Hər dəfə baş vermiş terakt və bununla bağlı istintaqın getməsi, yeni teraktlar ehtimalının olması əsas gətirilərək icmanın tam fəaliyyətinə icazə verilməyib. Q.Süleymanov qeyd edib ki, teraktla bağlı istintaq haqda da icmaya məlumat verilmir. -05B-