Qiyas İbrahimov və atasının cinayət işi üzrə hazırlıq iclası başlayıb

Bakı/31.10.17/Turan: Oktyabrın 31-də Bakının Yasamal Rayon Məhkəməsində hakim Hüseyn Səfərovun sədrliyi ilə NİDA Hərəkatının fəalı Qiyas İbrahimov və onun atası Həsən İbrahimovun cinayət işi üzrə hazırlıq iclası başlayıb.

NİDA Vətəndaş Hərəkatının üzvləri Qiyas İbrahimov və Bayram Məmmədov 2016-cı il mayın 10-da Heydər Əliyevin abidəsinin üzərində siyasi şüarlar yazdıqdan sonra həbs olunublar. Ancaq onlar qanunsuz narkotik maddə dövriyyəsində ittiham edilərək hər biri 10 il azadlıqdan məhrum edilib.

Bu il iyunun 5-də Bakı Apellyasiya Məhkəməsi Qiyas İbrahimovun şikayətini təmin etməyib.

Məhkəmə zalında insident baş verib. Belə ki, "şüşə qəfəs"də olan Qiyas İbrahimov prokuror çıxış edərkən dəfələrlə sədrlik edən hakim Vüqar Məmmədova əlləri ilə eşidə bilmədiyini işarə edib. Hakim ona məhəl qoymadıqda gənc fəal "şüşə qəfəs"dəki mikrofonu çıxararaq yerə atıb və sərt şəkildə etiraz edib. Bu zaman məhkəmə nəzarətçiləri "şüşə qəfəs"də Q.İbrahimovun qollarını arxadan qandallayıblar. Onun əlində sıyrıntı yaranıb və oturduğu skamyada qan izləri görünüb.

Buna məhkəmə zalında olan fəalın atası Həsən İbrahimov dözməyib və hakimlərə etiraz edərək "Allahınız olsun", "balalarınızın qarşısına çıxacaq" kimi ifadələr işlədib.

Q.İbrahimov isə hakimlərə etiraz olaraq "mantiya geyinmiş marionetkalar" deyə müraciət edib.

Bunu hakim heyəti "məhkəməyə hörmətsizlik etməsi, şərəf və ləyaqətin alçadılması" kimi qəbul edərək ata və oğuldan şikayət edib. Beləliklə, Ədliyyə Nazirliyinin İstintaq İdarəsində Qiyas İbrahimova və atası Həsən İbrahimova Cinayət Məcəlləsinin 289.2-ci maddəsilə (məhkəməyə hörmətsizlik) cinayət işi qaldırılıb.

Amnesty International təşkilatı Q.İbrahimovu "vicdan məhbusu" elan edib. Təşkilat hesab edir ki, gənclərə qarşı narkotik maddə ittihamı saxtalaşdırılıb.

Amma hakimiyyət təmsilçiləri onların "siyasi məhbus" olmasını qəbul etmir, konkret cinayətlərə görə cəzalandırıldığını bəyan edir.

Bu gün keçirilən hazırlıq iclasında vəkil Elçin Sadıqov Q. İbrahimovun "şüşə qəfəs"dən çıxarlaraq vəkilin yanında oturulması, cinayət işinə xitam verilməsi, cinayət işini Bakı Apellyasiya Məhkəməsinin icraatına qaytarılması və təqsirsizlik prezumpsiyasının tanınması barədə vəsatətlər verib.

Vəkil deyib ki, o, Bakı Apellyasiya Məhkəməsində 23 vəsatət verib. "Qiyas İbrahimov prokurorun və hakimin dediklərini eşitmirdi. O, dəfələrlə şüşə kamerada səslərin eşidilmədiyini əlləri ilə işarə etdi. Buna məhəl qoyulmadı. Məhkəmə zalında onun qolları qandallandı. Buna hakimlər münasibət bildirmədi. Mən 23 vəsatət verdim. Bütün vəsatətlərim rədd edildi. Bu halda Qiyas İbrahimovun və atasının etirazı məhkəməyə hörmətsizlik sayıla bilməz. Bu, Avropa Konvensiyasının 10-cu maddəsinə (fikri ifadə etmək azadlığı), Azərbaycan Ali Məhkəməsinin plenumlarının qərarlarına ziddir. Bu səbəbdən də cinayət işinə bəraətverici əsaslarla xitam verilməlidir", - vəkil qeyd edib.

Bununla yanaşı, E.Sadıqov Azərbaycan məhkəmələrinin qərarları ilə bağlı Avropa İnsan Hüquqları Məhkəməsinin "ədalətsiz məhkəmə araşdırması" barədə qərarlarına, ABŞ Dövlət Departamentinin insan hüquqları ilə bağlı hesabatlarına, beynəlxalq və yerli hüquq- müdafiə təşkilatlarının bəyanatlarına istinad edib.

Dövlət ittihamçısı Vüsal Abdullayev vəsatətləri müdafiə etməyib.

Hakim də vəsatətləri baxılmamış saxlayıb. Yalnız Q. İbrahimovun şüşə kameradan çıxarılaraq vəkilin yanında oturmasına icazə verib. Amma bu da uzun çəkməyib. Cəmi 15 dəqiqədən sonra Q. İbrahimov yenidən şüşə kameraya qaytarılıb.

Nəhayət, dövlət ittihamçısı məhkəmədə çıxış üçün vaxt istəyib. Beləliklə, hazırlıq iclası noyabrın 7-i saat 15.00-dək təxirə salınıb.

Q. İbrahimov Turan-ın məhkəmə zalında olan müxbirinin saxlanma şəraiti və səhhəti ilə bağlı sorğularını da cavablandırıb.

"Səhhətim normaldır. Gözlərimdə bir az sulanma yaranır. Mənə müəyyən səhiyyə xidmətləri göstərilir", - o qeyd edib.

Q.İbrahimiv həmçinin başqa məhbuslarla müqayisədə ona qarşı ayrı-seçkiliyin olmadığını bildirib.-03C-