Quba hadisələri üzrə təqsirləndirilən növbəti qrupun işi üzrə proses başlayır

Çərşənbə axşamı Quba rayon məhkəməsində Fizuli Pənahovun sədrliyi ilə 1 mart Quba hadisələri üzrə təqsirləndirilən növbəti qrupun işi üzrə hazırlıq iclası keçirilib.

Müttəhimlər kürsüsündə 7 nəfər əyləşir. Onlardan dördü – Akif Əliyev, Qabil Əliyev, Səfər Qəribov və Zimistan Əmiraslanov həbsdədir. Daha üç nəfəri – Telman Dadaşov, Samir Abdullayev və Məmmədhəsən Əkbərovdan ölkəni tərk etməmə haqqında iltizam alınıb.

Müttəhimlər CM-in 186.2.1 (başqasının əmlakını məhv etmə və ya böyük miqdarda ziyan vurma), 233 (ictimai asayişi pozma), 315.2-ci (hakimiyyət nümayəndəsinə müqavimət göstərmə) maddələri ilə ittiham olunurlar.

Quba Olimpiya Kompleksinin stadion rəhbəri vəzifəsində işləyən Akif Əliyevə qarşı həmçinin 127.2.3-cü (sağlamlığa ağır ziyan vurma) maddə ilə ittiham irəli sürülüb.

Müttəhimlərin hüquqlarını dövlət tərəfindən təyin edilmiş vəkillər müdafiə edir. Yalnız Akif Əliyevin öz vəkili var – Əsabəli Mustafayev. Hakim prosesi oktyabrın 3-nə təyin edib.

Qeyd edək ki, oktyabrın 2-də Quba rayon məhkəməsində 8 və 9 nəfərlik daha iki təqsirləndirilənlər qrupunun işləri üzrə dinləmələr davam etdiriləcək.

* 1 mart 2012-ci ildə Quba rayon icra başçısı Rauf Həbibovun yerli sakinlərin ünvanına təhqiredici ifadələrindən qəzəblənmiş minlərlə sakin Həbibovun istefası tələbi ilə küçələrə çıxıb. Aksiya iğtişaşlara çevrilib, rayon icra başçısının villası yandırılıb, daxili qoşunlarla qarşıdurma baş verib. -06D-