Rasim Əliyevin qətlinin ikinci ildönümü ilə bağlı RATİ-nin bəyanatı

Bakı/09.08.17/Turan: Reportyorların Azadlıq və Təhlükəsizlik İnstitutu (RATİ) həmkarı Rasim Əliyevin 2015-ci ildəki qətlinin Azərbaycan hakimiyyəti tərəfindən tam araşdırılmamasını pisləyir. RATİ İdarə Heyətinin sədri, jurnalist və hüquq müdafiəçisi Rasim Əliyev 2015-ci ilin 8 avqustunda bir qrup şəxs tərəfindən döyülməsindən bir gün sonra xəstəxanada naməlum şəraitdə dünyasını dəyişib.

Jurnalistin ölümü ilə bağlı açılmış istintaqın gəldiyi nəticəyə əsasən, jurnalist Azərbaycan milli futbol komandasının üzvü Cavid Hüseynovun qohumu olan bir qrup xuliqanın qurbanı olub, belə ki, həmin şəxslər guya Rasim Əliyevi futbolçunu tənqid etdiyinə görə döyüblər. Lakin, RATİ Rasim Əliyevin qətlini hakimiyyətin adi futbol fanatı hücumu kimi səhnələşdirilmiş siyasi motivli qisası hesab edir. Hakimiyyətin bunu etməkdə motivi ölümündən düz bir il əvvəl, 8 avqust 2014-cü il tarixində, Rasim Əliyevin öz sələfi, 2014-cü ilin oktyabrında yerinə gəldiyi əvvəlki RATİ İdarə Heyəti sədri Emin Hüseynova labüd həbsdən yaxa qurtarmaqda kömək etməsi ola bilərdi.

Rasim Əliyevin bir il sonra məhz həmin gündə hücuma məruz qalması hakimiyyətin onların planlarına ciddi maneə törədən şəxslərin qisasla üzləşəcəyi barədə cəmiyyətə dolayı mesaj göndərmək istəyinin göstəricisidir.

Qətlindən iki həftə əvvəl Rasim Əliyev peşə fəaliyyəti ilə bağlı təhdidlər almış, lakin yazılı müraciət etsə də, polis onu qəsdən qoruma ilə təmin etməmişdir.

Döyülmə nəticəsində xəsarətlər almasına baxmayaraq, jurnalist ciddi şəkildə müayinə olunmamış və 24 saat həkim nəzarətində ola biləcəyi reanimasiya şöbəsinə yerləşdirilməmişdir. Əksinə, jurnalist adi palataya yerləşdirilmiş və qohumlarına xəsarətlərin onun həyatına ciddi təhlükə təşkil etmədiyi bildirilmişdir. Gecə yarıdan sonra Rasim Əliyevin yaxın qohumları onun istirahət etməsi üçün xəstəxananı tərk etməyə razı salınmış və gecə saat 3 radələrində jurnalist xəstəxanada qeyri-müəyyən şəraitdə dünyasını dəyişmişdir. Həkimlərin rəyində qeyd olunur ki, Rasim Əliyevin durumu qəflətən ağırlaşmış və həkimlərin səylərinə baxmayaraq, onun həyatını xilas etmək mümkün olmamışdır.

Jurnalistin müraciətinə baxmayaraq polisin onu qorumaması və həkimlərin qəsdən onun həyatını xilas etməməsi, eləcə də polis və həkimlərdən heç kimin məsuliyyətə cəlb olunmaması jurnalistin cəzasız qalmış qətlinin arxasında yüksək çinli dövlət məmurlarının durduğuna işarə edir.

Hakimiyyət yalnız jurnalistin döyülməsində birbaşa iştirak etmiş şəxsləri həbs və məhkum etməklə kifayətlənmiş, siyasi zorakılıq motivini, həkimlərin qəsdli səhlənkarlığını və jurnalisti qorumalı olan hüquq mühafizə orqanlarının hərəkətsizliyini araşdırmamışdır.

Rasim Əliyevin ölümü xəstəxanada baş vermiş ilk jurnalist ölümü deyil. Elə həmin xəstəxanada 2012-ci ildə digər bir hökumət tənqidçisi, jurnalist və yazıçı Rafiq Tağı uğursuz qətl cəhdindən sonra analoji naməlum şəraitdə vəfat edib. O zaman, hakimiyyət qətli İslamçı fanatiklərin ayağına yazmış və sonradan qatillərin tapılmaması səbəbi ilə qətlin istintaqını ümumiyyətlə dayandırmışdır.

Buna qədər isə dövlətə xəyanət və İrana casusluq kimi saxta ittihamlarla həbs olunmuş yaşlı jurnalist və dilçi Novruzəli Məmmədov da həbsxananın müalicə məntəqəsində dünyasını dəyişib.

"Faciəvi hadisə kimi səhnələşdirilmiş və jurnalistlərin ölümü ilə nəticələnən hadisələr zənciri dövlətin repressiya maşını üçün bir praktikaya çevrilib," deyə RATİ-nin baş icraçı direktoru Emin Hüseynov qeyd edib. "Rusiya həbsxanasında Sergey Maqnitskinin ölümündən sonra baş verdiyi kimi, dünya ictimaiyyəti dövlət məmurlarına qarşı ciddi sanksiyalar tətbiq etmədiyi müddətdə jurnalistlərə qarşı törədilmiş cinayətlərə görə cəzasızlıq atmosferi nəinki davam edəcək, hətta daha da güclənəcək. Blogger Mehman Qələndərovun yaxınlarda baş vermiş həbsxanadakı ölümü bunun əyani sübutudur. RATİ-nin ofisinin bağlanmasından və Rasim Əliyevin qətlindən sonra hakimiyyətin RATİ İdarə Heyətinin hazırkı sədri, tanınmış jurnalist və blogger Mehman Hüseynovu saxta diffamasiya ittihamları ilə bu ilin martında həbs etməsi hakimiyyətin media və QHT-lər daxil olmaqla müstəqil vətəndaş cəmiyyəti institutlarına qarşı aşkar düşmənçiliyinin göstəricisidir," deyə Emin Hüseynov fikrini tamamlayıb.

RATİ hakimiyyəti Rasim Əliyev, Elmar Hüseynov, Alim Kazımlı, Novruzəli Məmmədov, Rafiq Tağı və Mehman Qələndərovun qətllərini yenidən araşdırmağa, bu cinayətlərin sifarişçilərini və icraçılarını tapmağa və cəzalandırmağa çağırır.

RATİ həmçinin hakimiyyəti öz tənqidçilərinin siyasi motivli həbsi praktikasına son qoymağa və jurnalistlər Əfqan Muxtarlı, Mehman Hüseynov, Məhbub Zülfüqarlı, Seymur Həzi, Əziz Orucov, Faiq Əmirli, Nicat Əliyev, Araz Quliyev, Fikrət İbişbəyli, Əfqan Sadıqov, Elçin İsmayıllı və Cavid Şirəliyevi, bloggerlər Rəşad Ramazanov və İlkin Rüstəmzadəni, yazıçılar Saday Şəkərli və Tofiq Həsənovu, eləcə də qraffiti fəalları Qiyas İbrahimov və Bayram Məmmədovu azadlığa buraxmağa çağırır.-0-