Sahibkar oğurlanmasında Moskva diasporunun liderlərini ittiham edir

Moskvada yaşayan Azərbaycanlı sahibkar Vahid Əzizov cümə günü Media Mərkəzdə mətbuat konfransı keçirərək, iki il əvvəl oğurlanması barədə danışıb.

    O, məhkəmənin onu oğurlayan dörd nəfər: Roman Bağırov, Elvin Əzizov, Bəhruz Qafarov və Fazil Ağayev barəsində çıxardığı qərarı ədalətsiz hesab edir.

    Bu şəxslər 145.2 (qanunsuz azadlıqdan məhrum etmə) və 182.1 (hədə-qorxu ilə tələb etmə) maddələri ilə mühakimə olunublar.

    Sahibkar işə yenidən baxılmasını və ittihamın “adam oğurluğu”na tövsif edilməsini istəyir. 

    Vahid Əzizov bildirib ki, oğurlandığı zaman dörd nəfərin hamısı özlərini Mütəşəkkil Cinayətkarlığa qarşı Mübarizə İdarəsinin əməkdaşları kimi təqdim ediblər, lakin sonradan məlum olub ki, onların vəsiqələri saxta idi.

    Əzizov xatırladıb ki, hadisə iki il əvvəl oktyabr ayında Saatlı şəhərində baş verib. “Onlardan biri polis formalı, digərləri isə mülki geyimli idi. Məndən 115 min manat tələb edirdilər”, deyə Ağayev bildirib. Onlar sahibkarın Moskvada cinayət törətdiyini və bunun əvəzində bu məbləği verməli olduğunu deyiblər. Lakin Əzizov heç bir cinayət törətmədiyi üçün Saatlı rayon prokurorluğuna müraciət edib.

    “Hazırda oğurlanmamın sifarişçilərinin cəzalandırılmasını istəyirəm. Bu, Moskvada Azərbaycan Cəmiyyətinin sədri Oqtay Hüseynov, “Diaspor” qəzetinin baş redaktoru Rafiq Hüseynov, “Azad Respublikaçılar” partiyasının sədri Kamil Seyidovdur.

    Əzizovun sözlərinə görə, bu barədə onu oğurlayanlardan biri – Roman Bağırov ona bildirib.

    Yuxarıda adı çəkilən şəxslərdən şərh almaq qeyri-mümkün görünür. -16C04-