Salyanda vəkil həbs olunmuş şəxslə görüşə buraxılmır

Şənbə günü Salyan rayon polis şöbəsi vəkil Əlayif Həsənovun müdafiə etdiyi şəxs, “Demokratiyaya Yardım” qeyri-hökumət təşkilatının fəalı Tofiq Qasımovla görüşünə icazə verməyib. T.Qasımov aprelin 4-də xuliqanlıqda ittiham olunaraq 10 sutkalığa həbs olunub.

Vəkil Turan-ın müxbirinə bildirib ki, aprelin 12-də o, Salyan rayon polis şöbəsinə gedib, order təqdim edib və həbsdə olan şəxslə görüşmək istəyib.

Lakin ona icazə verilməyib. Bir müddətdən sonra özünü istintaq şöbəsinin rəisi kimi təqdim edən polis zabiti onu qarşılayıb. Həmin əməkdaş deyib ki, həbsdə olanlarla görüşmək üçün məhkəmənin qərarı lazımdır.

Vəkil bu tələbi qanunsuz sayır. Çünki İnzibati Xətalar Məcəlləsinin 375-ci maddəsinə görə, inzibati qaydada həbs olunmuş şəxslə görüş üçün məhkəmənin icazəsi tələb olunmur.

Bununla belə, vəkil Salyan Rayon Məhkəməsinin rəhbəri Xaqani Tağıyevə telefon edib. Sonuncu deyib ki, inzibati həbsə məhkum şəxslə görüş üçün məhkəmənin icazəsi tələb olunmur.

Eyni zamanda hakim “bu gün iş günü olmadığına” əsaslanaraq T.Qasımovun həbsi barədə məhkəmənin qərarını vəkilə təqdim etməkdən imtina edib.

Bundan sonra vəkil rayon prokuroruna telefon edərək onunla görüşməsini və qanuni hüquqlarının təminatında yardım göstərməsini xahiş edib. Lakin prokuror “uzaqda olduğunu” deyərək onunla görüşmək istəməyib.

Sonra Ə.Həsənov polis rəisinə telefon edib. Sonuncu 10 dəqiqədən sonra təkrar zəng etməsini istəyib. Lakin sonra telefona cavab verməyib.

Vəkil Salyan polisinin qanunsuz hərəkətlərindən baş prokurora şikayət etmək niyyətindədir.

“Məni Tofiq Qasımovun yanına buraxmamaları onun taleyilə bağlı narahatlığı artırır. Bizdə olan məlumata görə, ona qarşı zorla pul almaq üzrə saxta cinayət işi hazırlanır. Bizim məlumatımıza görə, Qasımova qarşı şikayətlər toplanır, onun özü isə fiziki təzyiqlər göstərilir. Bütün bunlar “Demokratiyaya Yardım” qeyri-hökumət təşkilatına və onun fəallarına qarşı yönəlib.

“Demokratiyaya Yardım” qeyri-hökumət təşkilatına cənub regionunda tanınmış hüquq-müdafiəçisi, vətəndaş cəmiyyəti fəalı Emil Məmmədov rəhbərlik edir. O, dəfələrlə rayon hakimiyyəti strukturlarında korrupsiya faktlarını açıqlayıb.—06B--