Sədərək gömrükçüləri jurnalist Elman Abbasovun əşyalarında sanksiyasız axtarış aparıblar

Reportyorların Azadlıq və Təhlükəsizlik İnstitutunun (RATİ) Naxçıvan Muxtar Respublikası üzrə bölgə müxbiri Elman Abbasov Sədərək gömrük-buraxılış məntəqəsinin əməkdaşları tərəfindən təzyiqlərə məruz qalıb.

Avqustun 14-də o, Amerikanın İREX təşkilatının layihəsi çərçivəsində regionda miqrasiya proseslərinin jurnalist araşdırması ilə bağlı Türkiyəyə gedib. O, gömrükçülərin əsassız iradları ilə bağlı əvvəlki vəziyyəti nəzərə alaraq sərhəddi keçərkən üzərində olan əşyaları qeyd etdirmək üçün blank istəyib. Lakin ona blank verilməyib və bildirilib ki, geri qayıdanda onsuz da yoxlanılacaq.

Avqustun 15-də qayıdarkən E.Abbasov saxlanılıb, Sədərək gömrük-buraxılış məntəqəsinin

qaçaqmalçılıq şöbəsinin rəisi Vüsal Həsənovun iştirakı ilə onun əşyalarına baxış keçirilib.

E.Abbasovun sözlərinə görə, gömrükçülər fleş-kartda və fotoaparatda olanları yoxlayıblar, halbuki, orada şəxsi xarakterli informasiya olub. Bundan əlavə, kobud şəkildə E.Abbasovun əşyalarını, geyimlərini dağıdaraq diktofon axtarıblar.

E.Abbasov həmkarlarını çağırdıqdan sonra gömrükçülər onu buraxıblar.  

E.Abbasov və digər müstəqil jurnalistlər, vətəndaş cəmiyyətinin fəalları gömrük orqanının ünvanına tənqidi yazılarla əlaqədar dəfələrlə gömrükçülər tərəfindən təzyiqlərə məruz qalıblar.

Müşahidəçilərin fikrincə, E.Abbasovla indi baş verənlər yerli hakimiyyətin regionda miqrasiya prosesləri ilə bağlı jurnalist araşdırmasından yaranan narahatlığı ilə əlaqədardır. —06D--