Səhiyyə naziri şəxsən jurnalistin cəzalandırılması üçün məhkəməyə müraciət edib

Bakı/10.06.19/Turan: Nəsimi rayon məhkəməsi Səhiyyə Nazirliyinin mayın 18-də bu idarənin qarşısında tibb müəssisələrində rüşvətxorluğa qarşı təkbaşına etiraz aksiyası keçirən jurnalist Teymur Kərimova qarşı iddiasını icraata qəbul etməkdən imtina edib.

Hakim Babək Pənahov iddianı qəbul etməkdən imtinanı Səhiyyə Nazirliyinin hüquqi şəxs olması və xüsusi ittiham qaydasında iddia verə bilməyəcəyi ilə izah edib.

Bundan sonra səhiyyə naziri Oqtay Şirəlyev özü fiziki şəxs kimi jurnalisti məhkəməyə verib. O, jurnalistin maksimum cəza verilməklə, təkcə 147.2-ci (böhtan) deyil, həm də 148-ci (təhqir) maddə ilə məsuliyyətə cəlb edilməsini tələb edir.

Nazir hesab edir ki, jurnalist ona "mənimsəmə", "rüşvət alma", "insan ölümü" ilə bağlı böhtan atıb.

Şirəliyev həmçinin jurnalistin nazirin alkoqoldan sui-istifadə etməsi, həkimləri dilənçiliyə düçar etməsi, tibbi heyəti pula görə bir-birinə qarşı qoyması və s. haqqında bəyanatı ilə razı deyil.

Nazirin iddiasına iyunun 14-də hakim Azər Tağıyev baxacaq.

* Mayın 18-də Kərimov Səhiyyə Nazirliyi qarşısında təkbaşına etiraz aksiyası keçirib. O bildirib ki, ağır xəstə olan anasını dövlət tibb müəssisələrində pulla müalicə ediblər. Polis onu saxlayıb. Bir neçə saat sonra Kərimovu sərbəst buraxaraq, mayın 21-də Səhiyyə Nazirliyində qəbul ediləcəyinə söz veriblər. Eyni zamanda jurnalist prokurorluğa çağırılıb, burada onu həkimlərə rüşvət verməsi haqqında dindiriblər.

İyunun 7-də jurnalistin anası dünyasını dəyişib. -06-