Şeyxülislam A.Paşazadə İMYDT Ali Şurasının üzvü seçilib

4-5 noyabr 2015-ci il tarixlərində Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadənin başçılıq etdiyi nümayəndə heyəti noyabrın 4-5də Livanın paytaxtı Beyrut şəhərində səfərdə olub.  

Səfərin məqsədi İslam Məzhəblərinin Yaxınlaşdırılması Dünya Təşkilatının (İMYDT) Ali Şurasının (AŞ) iclasında iştirak etmək idi.

A.Paşazadə təşkilatın Məclisinin 50 üzvündən biri seçilib. İslam aləminin nüfuz və söz sahibi olan, çoxsaylı ölkələri təmsil edən alimlərin iştirak etdiyi iclasda A.Paşazadə çıxış edib. O, islam aləminin üzləşdiyi problemlər qarşısında islam həmrəyliyi, islam birliyi və xüsusən, məzhəblərarası birliyi möhkəmləndirməyi daha vacib saydığını deyib.

İclas çərçivəsində QMİ sədri təşkilatın və Ali Məclisin rəhbərləri, görkəmli islam alimləri ilə ikitərəfli görüşlər keçirib.

Livana səfəri çərçivəsində A.Paşazadə ölkə parlamentinin spikeri Nəbih Birri ilə görüşüb. Görüşdə hər iki ölkə arasında əlaqələrin inkişaf etdirilməsinə böyük ehtiyac olduğu və bu yöndə dini liderlərin də rolu xüsusi vurğulanıb.

A.Paşazadə Azərbaycanda Livan kimi çoxkonfesiyalıq sahəsində oxşarlıq olmasını, məzhəb və dini konfesiyalar arasında birlik və əməkdaşlığın çox yüksək səviyyədə olduğunu həmsöhbətinin diqqətinə çatdırıb. QMİ sədri bu birliyin başqa ölkələr üçün nümunə olduğunu xüsusi şəkildə nəzərə çatdırıb. -05D-