Şirvanda jurnalist Ziya Əsədlinin apellyasiya şikayətinə baxılır

Bakı/30.10.17/Turan:Oktyabrın 30-da Şirvan Apellyasiya Məhkəməsində "Azadlıq" qəzetinin bölgə müxbiri Ziya Əsədlinin məhkəmə prosesi başlayıb. Onun özü ilkin baxış iclasında iştirak etməyib. Bu haqda jurnalistin vəkili Elçin Sadıqov bilgi verib.

E.Sadıqov məhkəmə qarşısında üç vəsatət qaldırdığını söyləyib: "Ziya Əsədlinin istintaqı qapalı aparılıb, istədiyi vəkili cəlb etmək imkanı olmayıb. Həbs edilməsi də gözlənilməz olub. Bu işdə xeyli qaranlıq məqamlar var. Ona görə də məhkəmənin istintaqla aparılması barədə vəsatət verdim", - vəkil bildirib.

Vəkilin sözlərinə görə, məhkəmə vəsatətləri rədd edib.

Vəkilin digər vəsatəti Z.Əsədlinin barəsində həbs qətimkan tədbirinin dəyişdirilməsi haqda olub, məhkəmə heyəti bu vəsatəti də əsassız sayıb.

Daha bir vəsatət bütün iş materiallarının surətinin müdafiə tərəfinə təqdim edilməsi haqda olub və yalnız bu vəsatət təmin edilib.

Məhkəmə prosesi noyabrın 7-nə təyin edilib.

Xatırladaq ki, "Azadlıq" qəzetinin bölgə müxbiri Z.Əsədli sentyabrın 5-də Biləsuvar Rayon Məhkəməsinin hökmü ilə 3 il müddətinə azadlıqdan məhrum edilib. O, CM-in 221.3 (silah və ya silah kimi istifadə edilən predmetdən istifadə ilə xuliqanlıq) maddəsi ilə ittiham edilib.

Vəkil deyir ki, jurnalist bu il aprelin 19-da Biləsuvarda döyülüb, bu barədə "102 xidməti"nə məlumat da verib. Hadisə çayxanada baş verib. Jurnalist onu çayçı işləyən şəxsin döydüyünü deyir. Ziya Əsədlinin bildirməsinə görə, həmin şəxs hadisədən dərhal sonra polis idarəsinə gedib və ondan şikayətçi olub.

Çayçı məhkəmədə də deyib ki, jurnalistin fiziki zorakılığı ilə üzləşib. Bununla belə, şahidlərin sözlərinə görə, jurnalistin həbsini istəmədiyini də deyib.

Bu ilin aprelində Biləsuvarda sakinlər etiraz aksiyası keçiriblər. Onlar Bakı-Astara yolunu bağlayıblar. Ziya Əsədli deyir ki, həmin aksiyadan reportaj hazırlayıb yayması rayon rəhbərliyində xüsusi narazılıq yaradıb. Həmin hadisədən sonra da jurnalistin həbs edilməsi ilə nəticələnən insident baş verib.-05B-