Siyasi məhbuslar üzrə iki işçi qrupun əməkdaşlığı təklif olunub

Oktyabrın 18-də ictimaiyyətə 166 nəfərdən ibarət yeni siyasi məhbus siyahısı təqdim edilib. Bu siyahını ictimai xadimlər, vətəndaş cəmiyyəti, Xalq Cəbhəsi Partiyası, Demokratik Qüvvələrin Milli Şurası və s. dəstəkləyib.

Siyahını Sülh və Demorkatiya İnstitutunun rəhbəri Leyla Yunus (skype vasitəsilə), “Siyasi məhbuslarsız Azərbaycan” İctimai Alyansının əlaqələndiricisi Oqtay Gülalıyev və Siyasi Məhbuslar Monitorinq Mərkəzinin rəhbəri Elşən Həsənov təqdim edib.

Bir gün əvvəl məşhur ictimai xadimlər – Xədicə İsmayıl, Şahvələd Çobanoğlu, İntiqam Əliyev, Rəsul Cəfərov və başqalarından ibarət digər işçi qrup 94 nəfərlik siyasi məhbus siyahısını elan edib.

Siyasi məhbusların sayındakı fərq siyasi məhbusların müəyyən olunması metodları ilə əlaqədardır: “Biz haqqında istintaq materialları və məhkəmə qərarları olan şəxsləri siyasi məhbus kimi qəbul edirdik, potensial olaraq siyasi məhbus ola biləcək bütün digər şəxslər monitorinq altındadır”, deyə jurnalist Xədicə İsmayıl Turan-a bildirib.

Leyla Yunusun qrupu isə Avropa Şurasının müəyyən etdiyi 5 meyara uyğun olan hər kəsi siyasi məhbus hesab edir.

“Biz “Nardaran işi” üzrə həbs edilənlərin hamısını siyahıya daxil etdik”, deyən Oqtay Gülalıyev qeyd edib ki, “Nardaran işi” özü artıq siyasi iş kimi qəbul edilib.

“166”lıq siyahıda 78 “Nardaran məhbusunun” adı var ki, bu da “94”lük siyahıda olduğundan iki dəfə çoxdur. Amma tərəflər bir-birinə etiraz etmir, yalnız hesablama metodikasında fərq olduğunu qeyd edir.

Turan Agentiyinin direktoru Mehman Əliyevin sözlərinə görə, “Nardaran işi” üzrə növbəti məhkəmə prosesləri mütləq iki siyahını yaxınlaşdıracaq, belə ki, “94”lük qrupun qalan məhbusları siyahıya daxil etmək üçün sənədli əsasları olacaq.

Təqdimatda Xalq Cəbhəsi Partiyasının sədri Əli Kərimli siyahıda öz partiyasından həbs edilənləri ayrıca qeyd etməyi təklif edib. “Partiyamız ən güclü təqiblərə məruz qalır və bu, xüsusi diqqət tələb edir”, deyən Kərimli 11 partiya üzvünün həbsdə olduğunu vurğulayıb. Bu qeyd diqqətə alınıb.

Milli Şura sədri Cəmil Həsənli demokratları, islamçıları, digər siyasi və dini cərəyanların nümayəndələrini qanunsuz olaraq həbs olunmuş və ya təqiblərə məruz qalmış hər kəsin hüquqlarını müdafiə etmək üçün birləşməyə çağırıb.

Skype vasitəsilə bugünki təqdimatda iştirak edən Leyla Yunus qanunsuz həbslərdə, işgəncələrdə, qanunsuz məhkəmə qərarlarında əli olan şəxslərin aşkar edilməsi və məsuliyyətə cəlb edilməsi zərurətinə diqqət çəkib.

Müzakirələrin nəticələrinə görə iştirakçıların bir məqsəd – bütün siyasi məhbusların azad edilməsi üçün iki işçi qrupun əməkdaşlığı zərurəti haqqında fikri formalaşıb. -0-