Sosial-iqtisadi problemlərlə əlaqədar etirazlar

Azərbaycan  əhalisi öz vətəndaş hüquqlarının müdafiəsi məsələsində getdikcə fəallaşır, Turan məlumat verir.

İlk növbədə bu, iqtisadi və sosial problemlərlə bağlıdır ki, həm paytaxtda, həm də regionlarda vətəndaşlar müntəzəm olaraq bu problemlərlə üzləşir.

Ötən günlər Qarabağ zonasında və Abşeronda iki etiraz aksiyası keçirilib.

Oktyabrın 18-də Binəqədi rayonunun Xocahəsən qəsəbəsinin sakini kəndə qaz verilməməsinə etiraz olaraq avtomobil yolunu bağlamağa cəhd göstərib.

Oktyabrın 19-da Goranboy rayonunun Zazalı kənd sakinləri də Bakı-Gəncə trassını bağlamaq istəyiblər.

Bundan öncə oktyabrın 15-də Göyçay rayonunun bir qrup sakini yerli yol polisinin rəisi Vüqar Qasımovun istefasını tələb ediblər. Sakinlər onu rüşvətxorluqda və digər sui-istifadədə günahlandırıblar.

Oktyabrın 7-də isə avtovağzal ərazisindəki şəxsi evlərin sakinləri Bakı-Sumqayıt yolunda hərəkəti bağlayaraq etiraz aksiyası keçiriblər. Onlar sökülən evlərin bir kvadrat metrinə görə 500 manat verilməsinə etiraz ediblər. 

Nəhayət, oktyabrın 4-də Qarabağ müharibəsi veteranı Rövşən Qafarov “Yeni Günəşli” qəsəbəsində parkda ağacların kəsilib yerində ev tikilməsinə etiraz olaraq özünü yandırıb.

Bu cür etiraz aksiyaları Azərbaycan cəmiyyətində narazılığın artmasından və sosial-iqtisadi böhranın dərinləşməsindən xəbər verir.

Bunu hakimiyyət də başa düşür və zəncirvari reaksiyadan ehtiyat edərək etirazçılara qarşı cəza tədbirləri həyata keçirməkdən  çəkinmir, Turan qeyd edir.

İqtisadiyyat sahısində müstəqil ekspertlər, əsasən Qubad İbadoğlu, Vahid Məhərrəmli iqtisadi göstəricilərin azalması, işsizliyin artması, insanların həyat səviyyəsinin enməsi, hələ 2015-ci ilin yanvarında hakimiyyətin vəd etdiyi islahatların olmaması, yəni əhalinin etimadının azalması ilə əlaqədar narazılığın artacağını proqnozlaşdırırlar. —0-