Taleh Bağırzadə : Heydər Əliyevin vaxtında belə şeylər yox idi

Oktyabrın 19-da Bakı Ağır Cinayətlər Məhkəməsində "Müsəlman Birliyi"Hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin cinayət işi üzrə növbəti məhkəmə iclası keçirilib.

Hakim Əlövsət Abbasovun sədrlik etdiyi iclasda təqsirləndirilən şəxs Abbas Hüseynov çıxış edib. O, çıxışı zamanı onda və digər təqsirləndirilən şəxslərdə avtomat silahın olmadığını bildirib. “Onlar burda dedilər ki, bizdə avtomat silahı yox, tapança olub. Bizim qardaşlarımızı isə avtomat güllə ilə vurublar. Bəs bu avtomat güllə kimdə olub”.

Daha sonra Abbas Hüseynov karsdakı vəziyyətdən danışdı. “Məni karsa salıblar. Hələ də karsdayam. Nəyə görə karsa salındığım isə bilinmir.  Bu onun göstəricisidir ki, Mehriban Əliyevaya qarşı olan təhqirləri araşdırmaqdan, bizi karsa salırdırırlar.  Şənbə günü yağış yağırdı. Həmin soyuq havada polislər üç nəfəri soyundurub döydülər. Sabahı (bazar günü) altı nəfəri döyüblər. İnsan haqları bu işlə maraqlansın. Hamı bilir ki, bizim həbs olunmağımıza səbəb ifşa etdiyimiz haqsız rejimə görə burdayıq, silaha görə yox”.

Təqsirləndirilən şəxs Abbas Hüseynovdan sonra şahidlər dindirilib.

2015-ci il noyabrın 26-sında həbs olunan Rasim Bünyadov şahid qismində dindirilib. O, əməliyyat zamanı qətlə yetirilən Fərail və Rəfail Bünyadovun əmisi oğludu.

Bünyadov deyir ki, əməliyyat keçirilən gün çörək almaqdan qayıdarkən əmisigilin qapısında polisləri görüb:” Bu cür müsibət bir 1400 il əvvəl olub, bir də bu idi. Namaz üstündə adamlara hücum elədilər. İki mebel maşını ilə gəldilər. Xüsusi təyinatlılar idi. Ardı yenə gəlirdi. Düşdülər, əllərində nə isə vardı, qapının ağzına atdılar. Partlayış səsi gəldi, hər tərəfi tüstü bürüdü. Güllə ata-ata girdilər içəri”.

Bünyadov işgəncələr altında qol çəkdiyini və nəyə qol çəkdiyini bilmirdi. “Əmimoğlu Fərailin başını yarmışdılar. Üzündən qan leysan kimi axırdı. Cabbarı isə elə döyürdülər ki, sanki top çiləyirlər. Orda Hacı Talehin belini belə sındırmaq istəyirdilər, amma alınmadı. Bizi bandatdelə apardılar. Abbasın halı yox idi, pambıqla su verirdim ona. Sonra xəbər gəldi ki, Abbas ölüb.  Mənə bandatdelde Abbasın öldüyünü dedilər. Sonra dedilər ki, deyim Abbas mənə silah verib”.

Daha sonra hal hazırda həbsdə olan Nəbizadə Urfan ifadəsində, “Orda iki limonka və  doqquz patron qoydular qabağıma. Dedilər ki, Abbasa qarşı ifadə verim ki, guya mənə silah verib. Qorxumdan hamısına qol çəkmişəm. Vallah, “Quran” haqqı məndən çıxmayıb o limonka”.

Məhkəmə prosesi zamanı Hacı Tale hakimiyətin ünvanına bir sıra ittihamlar səsləndirib. “Onlar bizi, biz onları qorxutmaq istəyirik. Onlar narahatdılar, çünki itirəcək çox şeyləri var. Azərbaycana bir obyekt kimi baxırlar. Elə bir gözəl güşə yoxdur ki, oranı hasara almasınlar. Heydər Əliyevin vaxtında belə şeylər yox idi. 2003-cü ildən sonra dindarlara, dinə basqılar, hicaba qadağalar artmağa başladı. Bunlar qorxaq olduqları üçün Nardarana o cür girdilər. Mən üç ay azadlıqda oldum gördüm bunlar necə qorxurlar. Qorxaq insan sağlam düşünə bilmir. Haqq sözə dözümləri yoxdur. Tutsalar, da öldürsələr də qorxurlar. Bizim mübarizəmiz insanları ruhlandırır. Ən ağır maddələri veriblər, ən ağır işgəncələri ediblər. Biz ömürlük həbsi bağrımıza basıb qəbul edəcəyik. Bizim mübarizəmiz eşq mübarizəsidir. Qandalı da, onu vuranı da sevirik. Əsgərlər də bizim millətimizdir. Mən görmüşəm müstəntiq necə əzab çəkirdi. Danışırdıq, deyirdim halal edirəm sənə haqqımı. Heydər Əliyev deyirdi dövlət günahkar azadlıqda, günahsız həbsdə olanda sarsılır. Onun bu sözünə görə bu dövlət dağılmalıdır. Eldar Mahmudov çöldədir, günahsızlar içəridə. Ramil Usubov da Eldar Mahmudovun əkizi deyil? Hacı Məmmədov bunların içindən çıxmadı? Korrupsiya ölkədə ayaq tutub yeriyir. Neftin qiyməti düşən kimi bunların iç üzü açıldı. Bütün ölkəni yeyib dağıdıblar. Cahangir Hacıyevə 15 il cəza verməklə deyil. O, balaca fiqurdur. Eldar Mahmudov bu xəyanətləri edibsə, o birilər də edirlər. Biz xalq olaraq mübarizəmizi davam etdirməliyik. Azadlıq üçün zindanlara girməliyik. Nə qədər adam tutacaqlar? Qoy hamı zindana girsin. Sən qanını ver gör necə dəyərli olursan. Şəhidlik istəyənin bundan anlayışı olmalıdır. Mübarizə aparmaq lazımdır. Fədakarlıq etməsən olmur. Baxın demokratik ölkələrə. Hamısı inqilab edib, nə qədər insan canından keçib. Çünki azad yaşamaq istəyirlər. Artıq Daxili İşlər Nazirliyi başını itirib. Bunun qarşısında davam gətirmək lazımdır. Artıq inanmıram ki, bunlar bizim müstəqilliyimizi qoruyub saxlaya biləcəklər. O, İrandan, Türkiyədən, Rusiyadan, Ermənistandan qorxur, bir xalqdan qorxmur. Bütün dünyaya pul paylayır. Nardarana elə girirlər elə bil Qarabağa girirlər.Bunları dəlixanaya göndərmək lazımdır. Bunlarda din qorxusu var. Hakimiyyəti qorxu gücünə saxlayıblar. Əsas qorxu mənbələri də “Bandotdel”di. İnsanları onunla qorxudurlar”.

İclasda vəkil Fariz Namazlı çıxış edərək zərərçəkmiş şəxs kimi tanınan polis əməkdaşlarının zərərçəkmiş statuslarına xitam verilməsini istəyib. Bildirib ki, onlar heç bir zərər çəkməyiblər. Məhkəmə vəsatəti təmin etməyib.

Daha sonra iclasda Sabunçu rayon Polis İdarəsində işləmiş Cəsarət Məhərrəmov şahid kimi dindirilib. O, sualların çoxuna “bilmirəm” cavabını verib. Bu isə vəkillərin narazılığına səbəb olub. Hakim ondan sualları cavablandırmağı istəyib. O, deyib ki, noyabrın 5-də idarənin qarşısına gələndə konkret nəsə görməyib: “Mən gələndə polislər bir neçə nəfəri tutmuşdular, başqaları da çıxıb getmişdilər”. O, istintaq zamanı ifadə vermədiyini deyib. Hakim isə iş materiallarında ifadəsinin olduğunu bildirib.

İclasda Sabunçu rayon Polis İdarəsinin əməkdaşı olmuş Ağamir İbrahimov da 5 noyabrda baş verən hadisələr barədə ifadə verib. Bildirib ki, hadisə zamanı idarədə olub, şəxsi heyət az olduğundan ÇPA-dan kömək istəyiblər. Etiraza gələn şəxslərdən aktiv olanlar tutulub.

Taleh Bağırzadə isə deyib ki, A. İbrahimov “skoç Ədalət” adı ilə tanınan şəxsin kadrıdır: “2013-cü ildə Ədalət mənə çox işgəncə verib. Sabunçu rayon Polis İdarəsində kimlə danışdım məni başa düşdü, bir ondan başqa. Özü də Ermənsitanda doğulub. Axırda dedim yəqin bu doğum evində səhv düşüb”.

Sabunçu rayon Polis İdarəsində işləyən Yusif Qurbanov da iclasda ifadə verib. O, deyib ki, noyabrın 5-də Elçin Qasımov məsciddən çıxıb evə gedən zaman yolda qarşılaşıblar və Elçin Qasımov onun və hakimiyyətin əleyhinə söyüş söyüb. O, da Elçin Qasımovu saxlayıb idarəyə aparıb.

Taleh Bağırzadə isə şahidin dediklərini təsdiq etməyib: “Siz Elçini uşaqlıqdan tanıyırsınız. Bilirsiniz ki, necə yaxşı insandır. Elçin Bakı Dövlət Universitetinin elmlər namizədidir. İstəsə çıxıb mediada sözün deyə bilərdi. Sizə heç vaxt söyüş söyməzdi. 53 yaşınız var gəlib belə ifadə verirsiniz. Bu rejim sizləri belə hala salıb. Bir ayağınız burdadı, bir ayağınız gorda. Sizin də adınız yazılacaq mediada, tarixdə qalacaq. Ailəniz , uşaqlarınız var. Elçinə idarədə işgəncə verilib”.

Şahid isə E. Qasımova Sabunçu rayon Polis İdarəsində işgəncə verilmədiyini deyib.

Növbəti məhkəmə prosesi oktyabrın 21-i davam edəcək.—36С--