Taleh Bağırzadənin işi üzrə məhkəmə təxirə salınıb

İlahiyyatçı Taleh Bağırzadənin işgəncə tətbiq edilməsi və hüquqlarının pozulması ilə bağlı şikayəti üzrə məhkəmə qərarının elan edilməsi fevralın 19-na qədər təxirə salınıb. Bu barədə ilahiyyatçının vəkili Cavad Cavadov öz facebook səhifəsində yazıb.

Bağırzadə və onun 10-dan çox tərəfdarı noyabrın 26-da Nardaran qəsəbəsində xüsusi əməliyyat zamanı saxlanılıb və konstitusiya quruluşunu devirməyə cəhddə, habelə digər ağır cinayətləri törətməkdə ittiham olunub.

Məhkəmə nəzarəti qaydasında verilmiş şikayətdə Bağırzadənin müdafiə hüququnun pozulduğu, xüsusən, uzun müddət vəkilinin onun yanına buraxılmadığı, onun DİN-in Mütəşəkkil Cinayətkarlığa qarşı Mübarizə Baş İdarəsində saxlanıldığı və ona qarşı işgəncə tətbiq edildiyi bildirilir.

Nəsimi rayon məhkəməsində məhkəmə iclası 9 fevral saat 16:00-a təyin edilib.

Lakin iclas saat 15:00-da başlayıb. Bu zaman hakim Babək Hüseynov bildirib ki, müvafiq orqanlara göndərdiyi sorğulara cavab almayıb və obyektiv qərar çıxara bilmir. Bu əsasla o, iclası fevralın 19-na keçirib.

Vəkil hesab edir ki, məhbusa qarşı işgəncə tətbiq edilməsi məsələsinə dərhal baxılmalıdır ki, məhkəmə-tibb ekspertizası zorakılıq izlərini yoxa çıxmadan qeydə alsın. Bu, baş vermədiyinə görə ədalətli məhkəmə təhqiqatından söhbət gedə bilməz, deyə vəkil bildirib. -06D-