Qəzetimizin 16-17 yanvar tarixli saylarında “Bərbad hərbi vətənpərvərlik şousu” və “Saxtakarlıq - milli ideologiya ola bilməz” (http://www.bizimyolinfo.com/?sehife=1&xeber=6516)” başlıqlı yazılar rezonans doğurdu. Məqalədə uzun illər rəsmi çap və elektron mediada Avo ləqəbli erməni terrorçusu Monte Melkonyanın öldürülməsində iştirakı təbliğ olunan İbad Hüseynovdan danışılır. Məlum olur ki, İbad Hüseynovun bu təbliğatının nəticə verməsində 1992-ci ildən Xocavənd rayonunun icra başçısı olan qardaşı Eyvaz Hüseynovun önəmli xidməti olub. Eyni zamanda, konkret faktlarla Monte Melkonyanın öldürülməsində İbad Hüseynovun iştirak etmədiyi təsdiqlənir.
Təəssüf ki, material qəzetdə çıxandan sonra qarşı tərəfin mövqeyini öyrənə bilmədik, İbad Hüseynov və qardaşı Eyvaz Hüseynov haqlarında olan ittihamlara reaksiya vermədilər. Ancaq bu günlərdə “Kavkazskiy uzel” saytında sözləri Gülşən Behbuda, musiqisi İmruzə Hüseynova məxsus “İbadlar diyarı” () klipinə rast gəldik.
Klip “Milli Qəhrəman İbad Hüseynova həsr olunur” sətirləriylə başlanır və mahnını Flora Kərimova, Lalə Məmmədova, Sabina Babayeva, Gülyanaq və Gülyaz Məmmədova bacıları ifa edirlər. Bir daha qeyd edirik ki, İbad Hüseynovun Qarabağ döyüşlərində iştirakına heç bir şübhə ola bilməz. Ancaq onun Monte Melkonyanı öldürməsi haqqında iddialar yalan olduğu kimi Milli Qəhrəman adlandırması da doğru deyil.
Çünki İbad Hüseynov Milli Qəhrəman Fəxri adıyla təltif olunmayıb. Bu mənada hörmətli sənətkarımız Flora Kərimova da daxil olmaqla adları çəkilən müğənnilərin bu saxtakarlığa dəstək verməsi anlaşılmazdır. Yaxşı olardı, sənətçilər yuxarıda qoyduğumuz linklərlə bərabər Qaradağlı kəndinin sakinlərinin icra başçısı Eyvaz Hüseynova və onun qardaşı İbad Hüseynova etirazını göstərən aşağıdakı linkə də baxsınlar. O zaman hansı saxtakarlığa dəstək olduqlarını anlayarlar.
Bütün sadaladıqlarımızla əlaqədar həmin illərdə Müdafiə Nazirliyinin Xüsusi Təyinatlı Kəşfiyyat rotasının komandiri olmuş, ehtiyatda olan baş leytnant Tofiq Cəfərovla əlaqə saxladıq. Tofiq Cəfərov təəccüblə dedi ki, onun üçün də İbad Hüseynovun iç üzünün indiyə kimi niyə açılmadığı qeyri-müəyyəndir: “Əvvəla, İbad Hüseynov Milli Qəhrəman Fəxri adına layiq görülməyib. İkinci, İbad Hüseynov heç vaxt kəşfiyyatçı olmayıb. Mən 1992-ci ildən sonra Müdafiə Nazirliyinin rəsmi əmriylə Xüsusi Təyinatlı Kəşfiyyat rotasının komandiri kimi Xocavənd rayonuna təyin edilmişəm. Rotada 119 nəfər əsgər və zabit olub, onların siyahısını bu gün də saxlayıram. Mənim siyahımda İbad Hüseynov adlı əsgər olmayıb. O zaman onun 18 yaşı olduğundan bizim sıralarımızda belə bir əsgər döyüşməyib. Ancaq onun rəhmətlik qardaşı İlyas Hüseynov və icra başçısı Eyvaz Hüseynovu çox gözəl tanımışam”.
Tofiq Cəfərov dedi ki, həmin vaxt Muğanlı, Kurapatkin və Əmirallılar kəndlərinə onun rəhbərliyiylə Ağcabədi müdafiə batalyonu gedib: “Sonradan Müdafiə Nazirliyinə dəvət olundum, nazirlik məni Xüsusi Təyinatlı Kəşfiyyat rotasının komandiri təyin edərək zabit rütbəsi verdi. Biz elə o zamandan 702 və 708-ci briqadalarıyla kəşfiyyat əməliyyatlarının aparılmasına rəhbərlik etmişik. Amma İbad Hüseynov kəşfiyyat əməliyyatında heç zaman iştirak etməyib. Melkonyanın ölümünə gəldikdə, terrorçu 708-ci briqadanın əsgərləri tərəfindən BMP ilə vurulub, mən onun meyitini görmüşəm. Sadəcə, o zaman biz bilmədik ki, bu adam Melkonyandır.
Yalnız 5-6 gündən sonra Rusiya televiziyaları bu barədə xəbər verəndə bildik ki, UAZ-ın içində qalan erməni Melkonyandır. Ona görə İbad Hüseynovun onun başını kəsməsi barədə dedikləri qəhrəmanlıq şousu yaratmaqdır. Ümumiyyətlə, mənim icazəm olmadan, yaxud mən Müdafiə Nazirliyindən icazə almadan heç kim kəşfiyyata getməzdi.
Bu mənada bizim döyüş mövqelərində İbad Hüseynov adlı adam olmayıb. Onun əlində Müdafiə Nazirliyinin bir rəsmi sənədi də yoxdur, yalnız rəhmətlik qardaşı İlyas Hüseynovun verdiyi arayışı var. Nəhayət, İbad Hüseynov haqqında şounu polkovnik Rəhimov və zabit Qədirov yaradıb. Ki, onların da maddi marağı var.
Adlarını çəkdiklərim Ağcabədiyə mənim yanıma da gəlib pul, vəzifə təklif etdilər ki, İbad Hüseynov barəsində ittihamları dayandırım. O cümlədən, İbad Hüseynovun icra başçısı olan qardaşı Eyvaz Hüseynovdan da belə təkliflər almışam. Əslində, bu adamlar bizim apardığımız əməliyyatlardan xəbərdardırlar. Ancaq qardaşı icra başçısı olduğundan onun haqqında kitab yazdırır, klip çəkdirir, xarici ölkələrdə görüşünü təşkil etdirməklə saxta qəhrəman yetişdirirlər. Halbuki, saxta qəhrəmanla gənc nəslə heç bir tərbiyə vermək olmaz”.
Vaxtilə Hərbi Polisin rəisi vəzifəsində çalışdığını söyləyən Tofiq Cəfərov dedi ki, İbad Hüseynovun qanunsuz hərəkətlərindən xəbərdardır: “Mən İbad Hüseynovla üz-üzə oturub ona sübut edə bilərəm ki, müharibə veteranlarına qarşı təhqiramiz hərəkətlər edib. Əgər özünə arxayındırsa, buyursun, qəzetinizdə debata çıxaq.
Mənim 42 əsgər şəhidim var, onların adının mənimsənilməsi hansı vicdana sığar, bu saxta qəhrəmanlıqla Qarabağı azad etmək olarmı? Çox təəssüf ki, İbad Hüseynov kimi insanlara qazi adını layiq görürlər. Azərbaycanın şəhid oğullarının adını mənimsəməyə ona heç kim haqq verməyib. Əgər əlində qəhrəmanlığı barədə sənəd varsa, ondan hər zaman üzr istəməyə hazıram».
Cəmiyyət
-
Cümə axşamı paytaxtda hava tutqun olacaq, səhər az yağış yağa bilər. Mülayim cənub-şərq küləyi əsəcək. Havanın temperaturu gecə müsbət 8 +10, gündüz müsbət 12 + 15 dərəcə olacaq. Rütubət gecə və gündüz rütubət 65-75 faiz olacaq.
-
Noyabrın 12-də Bakıda Birləşmiş Millətlər Təşkilatının (BMT) İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) liderlərin toplantısı başlayıb. "Euronews" telekanalı BMT-dəki mənbələrə istinadən bildirir ki, tədbirdə 100-ə yaxın dövlət başçısı iştirak edir.
-
Çərşənbə günü paytaxtda gecə və səhər yağış yağacağı gözlənilir. Şimal-şərq küləyi günün ikinci yarısında cənub-şərq küləyi ilə əvəz olunacaq.
-
Builki COP29 iqlim konfransının aktiv səhnələri arasında özünü FINS Təşəbbüsü adlandıran bir qrup tərəfindən təşkil edilən balina ovu və dənizin dərinliklərindən faydalı qazıntıların hasilatına qarşı etiraz nümayəndələrin və müşahidəçilərin diqqətini cəlb edib. Lakin qrupun legitimliyi ilə bağlı suallar yaranır, çünki İnternetdə axtarış onun mövcudluğuna dair dağınıq qeydlərdən başqa çox az dəlil verir.
Rəy yaz