Tarixçilər Azərbaycan tarixinin tədrisi saatlarının azaldılmasından narazıdırlar

Bakı/25.07.20/Turan: Azərbaycanın orta və ali məktəblərində Azərbaycan tarixi üzrə proqram tədricən azalır. Professor Elmira Muradəliyeva bildirir ki, BDU-nun tarix fakültəsində “Azərbaycan tarixi və türk xalqlarının tarixi” üzrə saatları azaldıblar. Halbuki, bizim etnogenezə, mədəni əlaqələrimizə heç bir aidiyyəti olmayan slavyan xalqlarının tarixi (praktiki olaraq Rusiya tarixi) dəyişməyib”.

“Mən ali məktəblərdə “Azərbaycan tarixi” kursunun ləğv olunduğunu və “Azərbaycan dövlətçiliyi tarixi”nin (1918-ci ildən) yeni kursunun tətbiq olunduğunu yazmışam. Üstəlik, ali məktəb müəllimlərinin, ekspertlərin fikirləri nəzərə alınmayıb. Bir arqument göstərilir  - Avropa modeli üzrə tədrisin standartlaşdırılması.

Mənim böyük bir sualım var: niyə əməkhaqqıdan ilə başlamış və tibbi sığortaya qədər həyatımızın keyfiyyəti Avropa modeli ilə deyil? Xüsusilə indiki şəraitdə ermənilərlə ərazi və ideoloji müharibə şəraitində “Azərbaycan tarixi” kursunu ləğv etmək xalqın ölümünə bərabərdir! Müstəqillik illərində biz Vətənimizi həqiqətən sevməyi hələ də öyrənməmişik və üstəlik bu sevgi üçün gənclərin zehnini “daraldırlar”. Odur ki, düşməni harada axtarmaq lazımdır?”,- E. Muradəliyeva FB-də soruşur.

Tarixçi Arif Yunusov ona cavab olaraq bildirir ki, hətta sovet dövründə ləğv olunmayıb və ixtisar edilməyib. Müstəqil Azərbaycanda isə ləğv etmək istəyirlər?! Kimin ağlına belə bir cinayət sərsəmliyi gəldi?

Tarixçi alim Dilavər Əzimli problemi prezident səviyyəsinə qaldırıb. O, Miq.Az-da  dərc olunmuş açıq məktubla dövlət başçısına müraciət edib. Müraciət həm orta məktəb, həm də universitetlər üçün Azərbaycanın tarix dərsliklərində boşluqları xatırlatmaqdan başlayır.

O təəccüb edir ki, əgər sovet dövründə Bakı Dövlət Universitetində Azərbaycan tarixi üç il, sonra isə daha iki il xüsusi kurs tədris olunurdusa, onda nə üçün indi bu kurs sürətlə azalır?

Azərbaycan tarixi kursunun ağır itkiləri təhsil naziri Ceyhun Bayramovun dövründə baş verib. Əvvəlcə qeyri-tarixi fakültələrdə “Azərbaycan tarixi” kursunu 48 tədris saatına qədər azaldıblar, sonra isə 1918-ci ildən başlayan “Azərbaycanın müasir dövlətçilik tarixi” kursu ilə əvəz ediblər.

Tarixçilərin Təhsil Nazirliyinə müraciətindən sonra “Azərbaycan tarixi” kursu qeyri-tarix fakültələrində 60 saata qədər artırılıb, lakin qədim və orta əsrlər tarixi tədris edilməyib. Kursa yalnız müasir Azərbaycan tarixi düşüb. Tarix fakültələrində Azərbaycan tarixi kursu 315 saatdan 210 saata endirilib.

Ən böyük zərbə 195 tədris saatından 75 tədris saatına qədər azaldılmış “Türk xalqlarının tarixi” kursuna vurulub. Sərbəst qalan vaxt ingilis dilinin tədrisinə verilib.

Tarixçi Azərbaycan tarixinin tədrisinin azalması ilə gənclərin siyasi savadsızlığı və azərbaycanlıların ermənilərlə informasiya müharibəsində məğlubiyyəti arasında birbaşa əlaqə görür. Dilavər Əzimli tarixçiləri virtual konfrans keçirməyə, təhsil naziri və ölkə rəhbərləri ilə görüş üçün işçi qrupu yaratmağa çağırır.

Tusi adına Pedaqoji Universitetdən tarix üzrə dərslik və proqramların müəllifi və metodist Sevil Bayramova Turan-a baş verənləri  şərh edərkən bildirib ki, “Azərbaycan tarixi” kursunun tədrisinin azaldılması ölkədə qəbul edilmiş yeni Avropa təhsil formatına (Azərbaycanın 2005-ci ildə qoşulduğu “Bolonya təhsil sistemi”) uyğun olaraq həyata keçirilir. Məktəblilər və tələbələr daim artan informasiya həcmini mənimsəyə bilmirlər və buna görə də gənclərə peşə həyatında onlara lazım olan bilikləri müstəqil şəkildə tapmağı və mənimsəməyi öyrədirlər.

BDU-nun Azərbaycan tarixi kafedrasının  rəhbəri Azad Rzayev isə Turan-a Təhsil Nazirliyində yeni proqramın təsdiqlənməsini gözləməyi məsləhət görüb. “Hələlik dəqiq bir şey məlum deyil, gəlin, tələsməyək”, - A. Rzayev məsləhət edib.  0—