Vətəndaşlar ağacların kəsilməsinə qarşı çıxırlar

Bakı/16.08.21/Turan: Turan İnformasiya Agentliyinə Bakı sakinlərindən müraciətlər daxil olur. Vətəndaşlar müxtəlif vaxtlarda Nizami rayonu Qara Qarayev prospektində, Xətai rayonu Vunq Tau küçəsində, həmçinin Bakının digər rayonlarında yaşıllıqların məhv edildiyini bildirirlər. Şəhərin Yasamal rayonunda ağacların kəsilməsilə bağlı vətəndaşlardan daha çox məktub daxil olub.

Turan Ekologiya və Təbii Sərvətlər Nazirliyinə yazılı sorğu göndərib, xahiş edib ki, paytaxtda yaşıllıqların niyə yoxa çıxdığını, bunda kimin günahkar olduğunu və nazirliyin buna qarşı hansı tədbirlər gördüyünü açıqlasın.

Nazirliyin 11 saylı Regional Ekologiya və Təbii Sərvətlər İdarəsindən Agentliyə daxil olan məktubda, ölkədə qeydiyyat və monitorinqə, əkin, becərmə, kəsilmə və buna nəzarət üçün məsuliyyətin bölüşdürülməsi strukturu ətraflı təsvir edilir. Qanunvericilik məsuliyyətin mərkəzi, rayon icra hakimiyyətləri və bələdiyyə orqanları arasında bölüşdürülməsini nəzərdə tutur, Ekologiya və Təbii Sərvətlər Nazirliyinin üzərinə isə yalnız nəzarət vəzifəsi düşür.

Məktubda izah olunur ki, ölkə üzrə yaşıllıqların "götürülməsi" (yəni kəsilməsi) və köçürülməsi mərkəzi və yerli hakimiyyət orqanlarına (icra və bələdiyyə) müraciət etdikdən sonra həyata keçirilir, lakin Ekologiya və Təbii Sərvətlər Nazirliyinin rəyi (razılığı yox!) alındıqdan sonra. Tabelikdə olan ərazilərdə isə götürmə və köçürmə yalnız yerli, rayon və bələdiyyə orqanlarının qərarı ilə həyata keçirilir.

Beləliklə, nazirlik işarə edir ki, qanunvericilik bu dövlət qurumuna məhdud səlahiyyətlər verir. Bakıda Yaşıl massivlərin kəsilməsinə görə nazirlik təqsirkar deyil.

Eyni zamanda nazirlik qurumun paytaxtda bitki örtüyünün məhv edilməsində günahkar olanlara qarşı çıxardığı inzibati tədbirlər barədə agentliyə məlumat verib. Hər bir halda təqsirkarlar müxtəlif pul məbləğlərinə cərimələniblər.

2021-ci ilin yeddi ayında Bakıda 49 fiziki və hüquqi şəxsin barəsində belə qərar çıxarılıb. 34 halda qərar hüquq-mühafizə orqanlarına göndərilib, bu barədə nazirliyin 11-ci İdarəsi məlumat verir.

KİV Dövlət Ekoloji Təhlükəsizlik Xidmətinin rəisi Hikmət Əlizadəyə istinadən bildirib ki, 2017–ci ildə Azərbaycanda 55 min kubmetr, 2018–ci ildə 28 min kubmetr meşə, 2019-cu ildə 18 min kub metr qanunsuz olaraq kəsilib, 2020-ci ildə isə bu rəqəm 10 min kubmetrə enib.

Göründüyü kimi, icra hakimiyyəti orqanları prezident İlham Əliyevin Bakıda ağacların kəsilməsinə qadağa qoymasına məhəl qoymur.

"Mənə məlumat gəlir ki, şəhərdəki ağaclar əhatəyə alınır, sonra onlar kəsilir. Son dəfə icra hakimiyyəti orqanlarına, sahibkarlara xəbərdarlıq edirəm: bunu dayandırın. Mən Bakıda ağacların kəsilməsini qadağan edirəm",- 22 aprel 2009-cu il tarixində Nazirlər Kabinetinin I rübün sosial-iqtisadi inkişafının yekunlarına həsr olunmuş iclasında bildirib.

Bəzən 2017-ci ilin aprelində olduğu kimi, yerli icra hakimiyyətinin qadağasına məhəl qoyulmadıqdan sonra o, özü qayda-qanun yaratmalı olur. Belə ki, Bakının Yasamal rayonunda Mətbuat prospektində 54 ağacın qanunsuz kəsildiyi "Ovçu evi" ərazisində yaşayış binasının tikintisini dayandırmışdı. —0—