Xədicə İsmayılovanın apellyasiya şikayətinə baxılması noyabrın 25-nə qədər təxirə salınıb

Jurnalist Xədicə İsmayılovanın apellyasiya şikayətinə baxılması noyabrın 25-nə qədər təxirə salınıb. Bu qərarı bu gün Bakı Apellyasiya Məhkəməsi jurnalistin vəkillərinin üzrlü səbəbdən iştirak etməməsi ilə əlaqədar qəbul edib.

İsmayılova “akvariuma” yerləşdirilib və səs keçirməyən qəfəsdən öz tərəfdarlarına müraciət edə bilməyib. Bununla belə, o, 263 və 264-cü kameralardan yetkinlik yaşına çatmamış məhbusların karserə salındığı yazılan kağız qaldırıb.

İclas başladıqda İsmayılova hakimə üz tutaraq bildirib ki, vəkilləri əvvəlcədən məhkəməyə iştirak etməyəcəklərini bildiriblər və bugünki prosesə ehtiyac yox idi.

Lakin hakim İlqar Murquzov buna diqqət yetirməyib və növbəti iclası dekabrın 25-nə təyin edib.

Bakı Ağır Cinayətlər Məhkəməsi sentyabrın 1-də məşhur araşdırmaçı-jurnalist Xədicə İsmayılovanı mənimsəmə, qanunsuz sahibkarlıq, vergi ödənişindən yayınma və vəzifə səlahiyyətlərindən sui-istifadə ittihamları ilə 7,5 il müddətinə azadlıqdan məhrum edib. Eyni zamanda, 125-ci (özünü öldürmə həddinə çatdırma) maddəsi ilə ona bəraət verilib.

Yerli və beynəlxalq hüquq müdafiə təşkilatları əmindirlər ki, İsmayılovaya qarşı cinayət ittihamları uydurmadır və onun hakimiyyətin yüksək eşelonlarında korrupsiya faktları ilə bağlı jurnalist araşdırmaları ilə əlaqədardır. -06С-