Xədicə İsmayılovanın həbs müddəti iki ay uzadılıb

  Bu gün Nəsimi Rayon Məhkəməsi jurnalist Xədicə İsmayılovanın  həbs müddətini mayın 24-dək uzadıb. Bu  barədə  Turan-a vəkil Fariz Namazlı  bildirib.

Xatırladaq ki, X. İsmayıl 2014-cü il dekabrın 5-də həbs olunub. O,  özünü öldürmə həddinə çatdırmaqda ittiham olunur.

Lakin fevralın 13-də prokurorluq ona qarşı Cinayət Məcəlləsinin 179.3.2 (mənimsəmə və israf etmə - külli miqdarda törədildikdə), 192.2.2 (qanunsuz sahibkarlıq), 213.1(vergi ödəməkdən yayınma) və 308.2-ci (vəzifə səlahiyyətlərindən sui istifadə) maddələri ilə yeni ittihamlar irəli sürüb.

İstintaq həbs müddətinin uzadılmasını belə  əsaslandırıb ki, guya jurnalist şahidlərə təsir edə bilər, istintaqdan qaçıb gizlənə bilər. Eyni zamanda  onun cinayət işi üzrə əlavə ekspertiza rəyləri alınmalıdır.

X. İsmayıl bunu absurd sayaraq qeyd edib ki,  ona irəli sürülmüş ittihamlarla özünü təqsirli saymır. O qeyd edib ki, “Azadlıq” radiosunun Bakı birosunun rəhbəri olduğu müddətdə jurnalistləri işə götürmək  və ya hər hansı maliyyə fünksiyalarını yerinə yetirmək səlahiyyətində olmayıb. Sadəcə, Bakı və Praqa birosu arasında koordinator  olub.

Özünü öldürmə həddinə çatdırma ittihamına gəlincə, X. İsmayıl Tural Mustafayevin məhkəməyə gətirilməsini tələb edib. Hakim X.İsmayılın sözünü kəsərək ittihamın mahiyyəti barədə danışmasını  istəyib.

Fariz Namazlı məhkəmənin qərarından apellyasiya şikayəti veriləcəyini istisna etməyib.16D-