Zəngilan beynəlxalq hava limanına IATA kodu təyin edilib

Bakı/25.07.22/Turan:   Zəngilanda yeni inşa edilən hava limanına ZZE -  üçhərfli beynəlxalq kod təyin edilib. Müvafiq qətnamə Beynəlxalq Hava Nəqliyyatı Assosiasiyasının (IATA) sərnişin daşımalarına dair  konfransında qəbul edilib. Bu barədə "Azərbaycan Hava Yolları" Qapalı Səhmdar Cəmiyyətinin mətbua xidməti bildirib.

“Zəngilan rayonundakı beynəlxalq hava limanı Şərqi Zəngəzurda mühüm infrastruktur layihələrindən biridir. O, regionun sosial-iqtisadi inkişafında əhəmiyyətli rol oynayacaqdır. Zəngilan hava limanına üçhərfli IATA kodunun təyin edilməsi burada iri və müasir logistika mərkəzinin yaradılması istiqamətində daha bir addımdır”, - deyə “AZAL” prezidenti Cahangir Əsgərov bildirdi.

Hava limanına təyin edilmiş kod şəhərin (Zəngilan) və yerləşdiyi regionun (Şərqi Zəngəzur) adından istifadə edilərək yaradılıb.

Üçhərfli hava limanı kodu sərnişin və yük aviadaşımalarının kommersiya təşkilinə xidmət edir.  Beynəlxalq təxsisetmə zamanı və aerovoğzal komplekslərinin yerüstü xidmətlərinin fəaliyyətində, yəni beynəlxalq aviabilet satışı sistemlərində, uçuş cədvəlində, hava əlaqəsində istifadə olunur.

Xatırladaq ki, daha öncə  Zəngilandakı beynəlxalq hava limanına UBBZ - dördhərfli kod təyin edilib.

Zəngilanda beynəlxalq hava limanının inşasına 2021-ci ilin yazında başlanılıb. Tikintinin bu ilin sentyabrında başa çatdırılması planlaşdırılır. Burada bütün tip sərnişin və yük təyyarələri eniş edə bilər. Uçuş-eniş zolağının uzunluğu 3 000 metr, uzunluğu isə 60 metrdir.

Hava limanı terminalının  buraxılış qabiliyyəti saatda 200 sərnişin üçün nəzərdə tutulub. –06В-