Azərbaycan strateji tərəfdaşlıq sazişini imzalamağa hazır deyil

Bakı/14.05.19/Turan: Azərbaycan hökuməti təkcə Avropa İttifaqı ilə assosiativ münasibətlər sazişini imzalamaqdan yayınmadı, son hadisələr onun strateji tərəfdaşlıq sazişini imzalamağa da hazır olmadığını göstərdi. Bu fikri Turan Agentliyinin "Çətin Sual" verilişinə müsahibəsində Azərbaycan Demokratiq Qüvvələrinin Milli Şurasının (DQMŞ) rəhbəri Cəmil Həsənli bildirib.

"Bu gün, dünyadakı şərtlər elədir ki, Azərbaycanla Avropa İttifaqı arasında strateji sazişi imzalamağa mane olan şərtlərin, manelərin böyük əksəriyyəti aradan qalxıb. Amma Azərbaycan hakimiyyəti özündə güc tapıb bu addımı ata bilmir", deyə Həsənli bildirib.

O, Azərbaycan prezidenti İlham Əliyevin "Şərq Tərəfdaşlığı"nın 10 illiyi ilə əlaqədar yubiley tədbirlərində iştirakının Bakı və Aİ arasında münasibətlərin irəliləyiş gətirəcəyini düşünmür.

"Doğrusu, bizim ciddi bir gözləntimiz yox idi və biz bilirdik ki, saziş də imzalanmayacaq. Ona görə də, bu, adi görüşdür. Yenə də əsası olmayan vədlər və Azərbaycan haqqında doğru-dürüst olmayan məlumatların Avropa İttifaqının tribunasından elan edilməsinin şahidi olduq", deyə Həsənli sözünə davam edib.

Onun fikrincə, Aİ üçün Azərbaycanla münasibətlərdə fundamental hüquq və azadlıqlar əsas yer tutur, baxmayaraq ki, azad ticarət, ölkənin ÜTT-ə daxil olması və s. məsələlər də danışıqların predmetidir.

O xatırladıb ki, Avropa Parlamenti 4 iyul 2018-ci il tarixli qətnamədə Aİ və Azərbaycan arasında gələcək sazişdə insan hüquqları məsələsinin prioritet yerini qeyd edib.

Sənəddə siyasi məhbusların azad edilməsi, insan hüquqlarına hörmət, məhkəmələrin müstəqilliyinin təmin edilməsi, işgəncə təcrübəsinə son qoyulması və hətta korrupsiyaya qarşı mübarizə məsələləri əksini tapıb.

Həsənlinin fikrincə, hakimiyyətin bəyan etdiyi islahatlar, o cümlədən məhkəmə-hüquq sahəsində islahatlar imitasiya xarakteri daşıyır.

"Bir ölkədə nə qədər "ədliyyə islahatı" keçirilir? Bu "islahatlar" nəticəsində Azərbaycan insan haqlarına görə, insan azadlıqlarının qiymətləndirilməsinə görə yarım azad ölkədən azad olmayan ölkəyə gəlib çatdı. Azərbaycan hökuməti iqtisadiyyatla bağlı yol xəritələri hazılamışdı, bunun böyük bir təqdimatını da keçirmişdi və guya bununla iqtisadiyyatı inkişaf etdirəcəkdi. Hanı onlar? Hansı rəflərdə onları toz basıb?.. Məhkəmə islahatı aparan bir ölkədə son 2-3 ildə 30 nəfərə yaxın Azərbaycan vətəndaşı məhkəməsiz, istintaqsız terrorist adı ilə güllələnib", deyə Həsənli bildirib.

Onun sözlərinə görə, DQMŞ hesab edir ki, strateji tərəfdaşlıq sazişinin insan hüquqları ilə bağlı hissəsi assosiativ sazişin parametrlərinə uyğun olmalıdır.

"Çünki Azərbaycanda insan haqları ilə bağlı vəziyyət fəlakətli həddədir. Siyasi məhbuslarla bağlı əfv fərmanının verilməsinə və bir çox fəalların, jurnalistlərin, dindarlarınazad edilməsinə baxmayaraq, bu gün onların sayı 100-ün ətrafında ləngər vurur. Məhkəmələr tərəfindən qanunun pozulması və siyasi mülahizələrə görə insanların təqib edilməsi davam edir. İstintaq orqanlarında işgəncə laboratoriyaları yaradılır və işgəncələr hesabına insanların etmədiyi əməllərinə görə ifadələri alınır. Buna görə bizim istəyimiz ondan ibarətdir ki, Aİ ilə gələcək tərəfdaşlıq sazişi ölkənin insan hüquqları sahəsində bu fəlakətli vəziyyətdən çıxmasına şərait yaratsın, Avropa xalqlarının heç olmasa ən elementar insan hüquqlarını Azərbaycan vətəndaşları da öz həyatlarında hiss etsinlər", deyə Həsənli fikrini tamamlayıb. -06D-