“Azərsu”ya pullar ayrıldı, ancaq nəticəsi olmadı - ekspert baxışı

Bakı/06.05.21/Turan: “Məsələ belədir ki, “qorxmazlar” (“Azərsu” keçmiş sədri nəzərdə tutulur) vəzifələrə gələrlər də, gedərlər də, amma idarəçilik şəxsə yox, sistemə bağlıdır.”

Bunu iqtisadçı Zöhrab İsmayıl dövlət başçısı İlham Əliyevin “Azərsu” ASC-nin sədri Qorxmaz Hüseynovun vəzifədən azad olunması barədə sərəncamını Turan agentliyinin “Çətin Sual” proqramının mayın 6-da efirə gedən verilişində bildirib.

Xatırladaq ki, Prezident İlham Əliyevin 2021-ci il mayın 4-də imzaladığı sərəncamla “Azərsu” ASC İdarə Heyətinin sədri Qorxmaz Hüseynov tutduğu vəzifədən azad edilib.

İqtisadçı Zöhrab İsmayıl hesab edir ki, Qorxmaz Hüseynov ölkənin su sisteminə rəhbərlik etdiyi dövrdə bu sahəyə milyardlarla vəsaitlər yönəldilsə də ciddi nəticələr əldə olunmayıb.

Onun dediyinə görə, bir tərəfdən büdcə vəsaitləri ayrılırdı, digər tərəfdən aidiyyatı beynəlxalq qurumlardan maliyyə vəsaitləri daxil olurdu, bütün bunlara baxmayaraq ölkənin içməli su təchizatında uğur əldə edilmirdi: “Ona görə, indi məlum olur ki, Qorxmaz Hüseynov kimilər oyuncaq fiqurlar olub, pulları mənimsəməklə, talamaqla, özləri üçün miylonlar qazanıb,” deyə İsmayıl bildirir,

Bu şəxsin indi vəzifədən azad edilməsinə gəlincə, Zöhrab İsmayıl hesab edir ki, bu müəyyən mənada şəraitdən irəli gəlir, belə ki, indi “Azərsu” ASC-yə veriləcək böyük pullar yoxdur, digər tərəfdən isə artıq prioritet dövlət şirkətləri yox, Qarabağdakı iri miqyaslı tikinti-bərpa işləridir.

Ekspert su təchizatı sistemində elə də ciddi yenilik qazanılmamasını bu sahədəki idarəetmədə  gördüyünü bildirib. O deyib ki, “Azərsu”ASC  həm su mənbələrini idarə edir, həm də suyun satışını təşkil edir, halbuki istehsalçı satıcı ola bilməz.

Zöhrab İsmayıl hesab edir ki, təchizat məsələləri hansısa bir şirkətə tapşırla bilər, müxtəlif istiqamətlər üzrə su xətləri ayr-ayrı şirkətlərə tabe edilməklə müəyyən irəliləyişə nail olmaq mümkündür.

İqtisadçı əlavə edir ki, əgər idarəçilik bundan sonra da belə davam edərsə, gələnlər kim olursa olsun, indiki vəziyyəti dəyişə bilməyəcək.

Iqtisadçıya görə, “Azərsu” ASC rəhbərinin özü üçün 10-larla şirkət qurması və hökumətin bundan xəbərsiz olması qeyri-mümkündür və görünür burada kimsə ya qanundakı boşluqlardan, ya da yaradılan fürsətdən lazımi qədər istifadə edib.

“Azərsu” ASC-nın xarici inverstor tərəfindən alına bilməsinə gəlincə ekspert deyir ki, milyardlarla borcu olan bir səhmdar cəmiyyti hansısa inverstorun ala biləcəyinə inanmır.  

İsmayıla görə, vəziyyətdən çıxış yolu kompleks islahatlar aparılmasındadır və bunun başqa yolu da görünmür.

O həm də deyib ki, bu qədər borc içində ikən “Azərsu” ASC- 120 milyon manatlıq ofis binası tikdirməsi anlaşılmaz görünür. -05B-