Qarabağdan sonra demokratiya da gələcəkmi? – Bəşir Süleymanlı Çətin sualda

Bakı/17.10.23/Turan: Oktyabrın 15-də Prezident İlham Əliyev Xankəndidə dövlət bayrağını qaldırdı. Artıq Azərbaycan Qarabağ bölgəsinə nəzarəti tam bərpa edib.

Qarabağdan sonra Azərbaycana demokratiya da gələcəkmi?

Yeri gəlmişkən, gələn il Azərbaycanda bələdiyyə seçkiləri keçirilməlidir.  Bu seçki əvvəlkilərdən fərqli olacaq. Çünki artıq Qarabağ da var. Prezident Administrasiyasının açıqladığı reinteqrasiya planına görə, Qarabağda erməni sakinlərin yaşadıqları ərazilərdə idarəetmə Azərbaycan Prezidentinin xüsusi nümayəndəlikləri vasitəsilə həyata keçirilir. Həmçinin, Qarabağda bələdiyyələr formalaşdırılmalıdır. İndi necə olacaq? Seçkidə Qarabağdan kimlər iştirak edə bilər? Qanunvericiliyə hər hansı dəyişiklik edilməlidirmi?

Bu arada məlum olub ki, gələn ilin büdcəsindən MSK-ya seçki üçün 2 dəfə artıq pul ayrılıb. 2024-cü ilin dövlət büdcəsi haqqında" qanun layihəsində göstərilir ki, gələn il dövlət büdcəsindən seçkilərin keçirilməsi və statistika tədbirləri üçün 110 milyon 935 min manat ayrılması nəzərdə tutulub. Bu, 2023-cü ilin dövlət büdcəsindən eyni istiqamətə ayrılan vəsaitlə müqayisədə 2.3 dəfə çox vəsait deməkdir. 2024-cü ildə seçkilərə sonuncu parlament seçkilərinin keçirildiyi 2020-ci illə müqayisədə (57.7 milyon manat) 1.9 dəfə, sonuncu bələdiyyə seçkilərinin keçirildiyi 2019-cu illə müqayisədə (51.3 milyon manat) 2.2 dəfə, sonuncu prezident seçkisinin keçirildiyi 2018-ci illə müqayisədə isə (67.6 milyon manat) 1.6 dəfə çox vəsait ayrılıb. Dediyimiz kimi gələn il bələdiyyə seçkiləri ilidir. Bəs ikinci seçki nə ola bilər? Referendum?

Demokratiya Azərbaycana bu seçkilərlə gələcək?

Bütün bunlarla bağlı Vətəndaş Hüquqları İnstitutunun rəhbəri Bəşir Süleymanlı Kamran Mahmudovun təqdimatında yayımlanan “Çətin sual” verilişində danışır.