ABŞ-ın yüksək rütbəli rəsmisi deyir ki, Çin artan Rusiya-Şimali Koreya müttəfiqliyindən getdikcə daha çox narahat olur

BUSINESS INSIDER: ABŞ dövlət katibinin müavini Kurt Kempbellin sözlərinə görə, Çin Kim Çen Inın Şimali Koreyası ilə Vladimir Putinin Rusiyası arasındakı ittifaqdan getdikcə daha çox narahat olur.

ABŞ Putinin Ukrayna qüvvələri tərəfindən ələ keçirdiyi əraziləri geri almağa çalışdığı Kurskda 11 mindən çox Şimali Koreya əsgərinin yerləşdirildiyinə inanır.

Öz növbəsində Rusiya Şimali Koreyaya iqtisadi və diplomatik dəstək verir.

“The Guardian” xəbər verir ki, Kempbell ötən həftə Strateji və Beynəlxalq Araşdırmalar Mərkəzində çıxışı zamanı deyib: “Şimali Koreyanın Rusiya ilə əlaqəsi çinli həmsöhbətlər üçün getdikcə daha çox narahatedici mövzuya çevrilir”.

"Bizim apardığımız bəzi müzakirələrdə Şimali Koreyanın niyyətləri haqqında bilmədikləri şeylər barədə onlara məlumat veririk. Çin Rusiyanın dəstəyinin Şimali Koreyanın onların maraqlarına uyğun olmayan hərəkətlərə keçməsinə səbəb ola biləcəyindən narahatdırlar", - deyə o bildirib.

O, əlavə edib ki, Çin Rusiyanı birbaşa tənqid etməyib, “amma biz Pxenyan və Moskva arasında artan koordinasiyanın onları əsəbiləşdirdiyinə inanırıq”, - deyə o bildirib.

Rusiya və Şimali Koreya Çinin ən yaxın beynəlxalq müttəfiqləri arasındadır, lakin analitiklər deyirlər ki, Pekin avtoritar güclər arasında ittifaqın potensial nəticələrindən ehtiyat edir.

Rusiyanın Şimali Koreyaya dəstəyi Şimali və Cənubi Koreyanın onilliklər ərzində dondurulmuş münaqişəsində incə güc balansını poza bilər.

Cənubi Koreya artıq Şimali Koreyanın Rusiyaya dəstəyinə cavab olaraq Ukraynaya silah ötürməklə hədələyib və gərginlik Şərqi Asiyaya da keçə bilər.

Rusiya-Şimali Koreya alyansı Çinin Şərqi Asiyada təsirini zəiflədə və ABŞ-ın regiondakı müttəfiqlərini bir-birinə yaxınlaşdıra bilər.

Bəzi müşahidəçilər həmçinin hesab edirlər ki, yeni seçilmiş prezident Donald Tramp yanvarda vəzifəyə başladıqdan sonra ABŞ-ın ən güclü rəqiblərindən olan Çin və Rusiya arasında münasibətləri pozmağa çalışa bilər.

Böhran Qrupunun analitiki Ali Vayn iyun ayında “Business Insider”ə bildirib ki, "Çin, ehtimal ki, Rusiya və Şimali Koreya arasında əlaqələrin dərinləşməsinə bir qədər ehtiyatla baxacaq".

“Çin Rusiyanın Şimali Koreyanın nüvə və raket proqramlarının inkişafına töhfə verə biləcək hərbi yardım göstərməsi ehtimalından narahatdır”.

Bununla belə, Çin həm Rusiya, həm də Şimali Koreya üzərində əhəmiyyətli təsir rıçaqlarına malikdir. Çin Ukraynadakı müharibədə Kremlə kritik iqtisadi və diplomatik dəstək verib və onilliklər ərzində Şimali Koreya ilə sıx iqtisadi və siyasi əlaqələr saxlayır.

Ekspertlərin fikrincə, Çin istəsə, Şimali Koreya-Rusiya ittifaqını cilovlamaq üçün bu rıçaqdan istifadə edə bilər.

Digərləri isə bu ittifaqın Çinə xeyir verdiyinə inanırlar. "Onlar bunu rəsmi olaraq alqışlamaya bilər; bunu narahatedici vəziyyət kimi görə bilərlər", - deyə Cənubi Asiya və Hind-Sakit Okean Məsələləri üzrə Stokholm Mərkəzinin rəhbəri Caqannat Panda bir qədər əvvəl BBC-yə deyib.

“Ancaq çinlilər Şimali Koreya, Rusiya və Çinin birlikdə güclənəcəyi fürsəti axtarırlar və məncə, Şimali Koreyanın Rusiyaya qoşun göndərməsi buna sübutdur”.

Panda bildirib ki, Çinin strateji məqsədi mövcud dünya nizamını pozacaq avtoritar sistem yaratmaqdır. Onun sözlərinə görə, Şimali Koreya və Rusiya arasında güclənən müttəfiqlik buna doğru bir addımdır.