Erdoğan hökuməti Gülenin İsraillə əlaqələrinə işarə edir

İlahiyyatçı Fetullah Gülenin tərəfdarları baş nazir Erdoğanın 2009-cu ilin noyabr ayında Davos forumunda İsrailə qarşı sərt addımından sonra Türkiyə hökumət üzvləri haqqında məlumat toplamağa və onların telefon danışıqlarını dinləməyə başlayıblar. Bu barədə bu gün ölkənin xarici işlər naziri Efkan Ala bildirib.

Türkiyə KİV-lərinin məlumatına görə, DİN rəhbərinin bəyanatı hakim AKP-nin qapalı iclasında səslənib. “Gülen icması Davos hadisəsindən sonra bizim haqqımızda məlumat toplamağa başlayıb”, deyə Ala bildirib.

Gülen hərəkatı və Türkiyə hökuməti arasında münaqişə 2013-cü ilin dekabr ayında korrupsiya qalmaqalından sonra açıq mərhələyə keçib. Həmin vaxt üç nazir mənzillərində milyonlarla dollar nağd pul və korrupsiya faktları aşkar edilməsi ilə əlaqədar istefa vermək məcburiyyətində qalıb.

Bu biabırçılığı etiraf etmək yerinə Erdoğan yüzlərlə polisi və prokuroru işdən çıxarıb, polisin 7 min vətəndaşın telefonunu dinləməsi haqqında sənədləri yayıb.

Danışıqları dinlənilənlər arasında ölkə prezidenti Abdullah Gül, baş nazir Erdoğan, onların doğmaları və yaxın çevrələri olub.

Erdoğan telefonların kütləvi şəkildə dinlənilməsinin təşəbbüskarlarını “hökumət daxilində cinayətkar qruplaşma” adlandırıb və onları Gülenin rəhbərlik etdiyi “Hizmet” hərəkatı ilə əlaqələrdə təqsirləndirib. Bir müddət əvvəl Erdoğan Vaşinqtondan Güleni mühacir olaraq yaşadığı ABŞ-dan ekstradisiya etməyi tələb edib. Lakin onun çağırışı eşidilməyib. -02D-