İctimai fəallar məscid tikilməsinə qarşı çıxırlar

Türkiyədə bir qrup ictimai fəal İstanbulun Üsküdar hissəsindəki Validebağ qoruğuna bitişik yerdə məscid tikilməsinə etiraz edirlər.

Oktyabrın 30-da Üsküdar bələdiyyəsi bu məsələdə maraqlı olan tərəfləri Üsküdar valiliyinə toplayıb. Toplantıda bu məsələ ilə bağlı məhkəmədən yazılı mövqe alınana kimi məscid tikintisinin dayandırırlması qərara alınıb. Qərar tikintini aparan firmaya həm yazılı, həm də şifahi olaraq çatdırılıb.

Bundan əlavə, Üsküdar bələdiyyəsi İstanbul 17-ci dairə məhkəməsinə inşaatla bağlı açıqlama verməyi xahiş edib.

Məscidin tikilməsinə qarşı olan qrup məscidin tikilməsi nəzərdə tutulan ərazini tərk etməyərək növbə çəkirlər. “Kim məscid istəyirsə, Ərəbistana getsin” deyə ictimai fəallar məscid tikməyə tərəfdar olanlara mövqelərini ifadə edirlər.

Türkiyənin dini işlər üzrə rəhbəri Görmez məscid tikilməsi tərəfdarlarına “bütün yer üzü bizlər üçün ibadət yeridir, burada isə bir tərəfdə məscid tikmək sevgisi, digər tərəfdə isə təbiəti qorumaq sevgisi tərəflərin bir-birinə qəzəbinə səbəb olur, bu, yolverilməzdir, buna son qoyun”, deyə müraciəti edib. -05D-