Rəsmi Ankaranın yandaşı olan jurnalist polis əməliyyatını pislədi

Türkiyə prezidenti Erdoğana yaxınlığı ilə seçilən “Yeni Şafak” qəzetinin əməkdaşı Abdulkadir Selvi “Hizmet” Hərəkatına qarşı “paralel dövlət” adı ilə hökumətin başladığı əməliyyata tənqidi mövqe ifadə edib.

O, bu əməliyyat zamanı baş veyən həbsləri  vaxtilə türk generallarına qarşı “Ergenekon” əməliyyatı ilə müqayisə edib. “Atdıqları bu addım Türkiyəni bütün dünyada rəzil etməkdən başqa heç nəyə yaramadı”, deyə A.Selvi əməliyyata münasibətini bildirib. Jurnalist “Zaman” qəzetinə, “Samanyolu TV” kanalına basqının mənasını anlamağın mümkünsüz olduğunu vurğulayıb.

““Ergenekondakı kimi bir həbs “çuval”ı açılıb, hər kəsi bu çuvala doldurmaq istəyirlər”, deyə hökuməti qınaq atəşinə tutub.

Dekabrın 14-ü səhər saatlarından etibarən Türkiyədə Fetullah Gülenin rəhbəri olduğu “Hizmet” Hərəkatına, o cümlədən “Zaman” qəzeti redaksiyasına və “SamanyoluTV” kanalının binasına polis əməliyyatı keçirilir. Erdoğan hökuməti “Hizmet” Hərəkatını “paralel dövlət” adlandırır, bu əməliyyatı Hərəkatın Türkiyədə “dövlət çevrilişinə hazırlaşması” kimi dəyərləndirir. Əməliyyat 12 vilayəti əhatə edib. İndiyə kimi 30-a yaxın şəxsin saxlanıldığı bildirilir.

Xatırladaq ki. keçən il dekabrın 12-də Türkiyədə “korrupsiya və rüşvətə qarşı” əməliyyat keçirilib, əməmliyyat nəticəsində Erdoğan hökumətinin 4 naziri, övladları, iş adamları, Erdoğanın özü, ailə üzvləri rüşvət və korrupsiyda təqsirli bilinib. O zaman Erdoğan bu əməliyyatı “Hizmet” Hərəkatının təşkil etdiyini deyərək, Hərəkatı Türkiyə daxilində “paralel dövlət” adlandırıb. Türkiyənin bəzi xəbər saytları hökumətin Hərəkata qarşı başlatdığı polis əməliyyatını “Hərəkata qarşı cavab və qisas əməliyyatı” adlandırır. -05D-