Türkiyə xüsusi xidmət orqanları təhlükəli PKK terrorçusunu zərərsizləşdirib

Anadolu Ajansı: Türkiyə Milli Kəşfiyyat Təşkilatı (MİT) terror təşkilatı PKK/KCK-nın qadın qanadının İran-İraq sərhədindəki fəaliyyətinə “məsul” olan terrorçu Zeynep Averi zərərsizləşdirib.

Türkiyə təhlükəsizlik güclərindəki mənbələrdən verilən məlumata görə, “Arien Are” kod adlı terrorçunun İraqın Süleymaniyyə bölgəsindəki Pəncəvin yaxınlığında olduğu müəyyən edilib.

Şimali İraqdakı hərbi bazalara qarşı hücumlar təşkil etməyi planlaşdıran Averi Türkiyə kəşfiyyatı tərəfindən məqsədyönlü əməliyyatla zərərsizləşdirilib.

Prezident Rəcəb Tayyib Ərdoğan bildirib ki, PKK yaraqlılarının Türkiyədə ilk dəfə qanlı cinayət törətdiyi 1984-cü ildən 2020-ci ilin mart ayına qədər 7500 türk təhlükəsizlik qüvvəsi əməkdaşı və 6800 dinc sakin bu qanlı təşkilatın əli ilə həlak edilib.

ABŞ və Avropa Birliyi PKK-nı terror təşkilatları siyahısına salıb.

Ankaranın mövcud vəziyyəti həll etmək üçün yollar tapmaq cəhdlərinə baxmayaraq, terror təşkilatı PKK 2015-ci ilin iyul ayından yenidən silahlı hücumlara başlayıb.

Son illərdə PKK bölgədəki qanlı cinayətlərə görə məsuliyyəti öz qollarına yükləməyə çalışır.

Suriyada PKK terrorçuları PYD və YPG adlarının arxasında gizlənir və son iki ildə özlərini “Suriya Demokratik Qüvvələri” adlandırırlar.

İranda PKK “Kürdüstanın Azad Həyat Partiyası” (PJAK) kimi fəaliyyət göstərir.