Türkiyədəki hərbi çevriliş cəhdi 3-cü ilində dünyaya tanıdılır

Fətullahçı terror təşkilatının (FETÖ) 15 iyul 2016-cı ildə həyata keçirməyə çalışdığı və xalqın iradəsiylə qabağı alınan hərbi çevriliş cəhdinin mahiyyəti ictimaiyyətə və dünyaya daha geniş şəkildə izah edilir.

Turan İnformasiya Agentliyinın məlumatına görə, bu məqsədlə Türkiyə Cümhuriyyəti prezidentinə bağlı Kommunikasiya başqanlığı İstanbulun Taksim meydanında tanıtma çadırı qurdurub.

5 bölmədən ibarət olan çadırda FETÖ-nün 15 iyul 2016-cı il hərbi çevriliş cəhdinin ərəfəsində ölkənin vəziyyəti, çevriliş cəhdinin baş verdiyi saatlarda cərəyan edən hadisələr, iyulunda 16-da gecə yarısı prezident Rəcəp Tayyip Ərdoğanın xalqa müraciət edərək əhalini meydanlara səsləməsi, çevriliş cəhdinin basdırılması və avqustun 7-də Yenikapı meydanında ölkə rəhbərliyinin və siyasi partiya liderlərinin iştirak etdiyi Demokratiya mitinqindən videogörüntülər nümayiş etdirilir. Kommunikasiya başqanlığının əməkdaşları Türkiyə vətəndaşlarının, əcnəbi turistlərin, yerli və əcnəbi medianın yaxından maraq göstərdiyi videogörüntülərlə bağlı ətraflı məlumat verirlər. Taksim meydanında qurulan çadırda FETÖ-nün 15 iyul hərbi çevriliş cəhdiylə bağlı videoların bir neçəsinin nümayiş etdirilməsi planlaşdırılır. İyulun 15-də saat 20:00-da Türkiyə Cümhuriyyətinin prezidenti Rəcəp Tayyip Ərdoğanın çevriliş cəhdinin əsas mərkəzlərindən biri olan İstanbuldakı Atatürk aeroportunda xalqa müraciət etməsi gözlənilir.

Qeyd edək ki, illər boyu Türkiyə dövlətinin müxtəlif qurumlarında yuvalanan Fətullahçı terror təşkilatının üzvləri 15 iyul 2016-cı ildə ordudakı qüvvələrini hərəkətə gətirərək hərbi çevrilişə cəhd göstərib. Parlamentdə təmsil edilən siyasi partiyaların üzvləri Türkiyə Böyük Millət Məclisində toplanaraq çevriliş cəhdinə qarşı çıxarkən Məclisin binası terrorçular tərəfindən 2 dəfə bombalanıb.İ yulun 16-da gecə saat 00.30-da ölkənin cənub qəsəbələrinin birində qaldığı mehmanxanadan TV canlı yayımına bağlanan prezident Rəcəp Tayyip Ərdoğan xalqı hərbi çevriliş cəhdinə müqavimət göstərməyə və çevrilişçiləri tərksilah etməyə çağırıb. Prezident Ərdoğanın çağırışından sonra əhali kütləvi şəkildə küçə və meydanlara çıxaraq çevriliş cəhdini dəf edib. Prezident Ərdoğan ailəsiylə birlikdə saat təxminən 4:00-da İstanbul aeroportuna enərək xalqa yenidən müraciət edib. Çevriliş cəhdinin tamamilə dəf edilməsindən sonra- 16 iyul saat 16:00-da prezident Ərdoğan İstanbul aeroportunu tərk edib. Prezident Ərdoğanın təşəbbüsü ilə avqustun 7-də İstanbuldakı Yenikapı meydanında 5 milyon nəfərin iştirakı ilə Demokratiya mitinqi keçirilib. Mitinqdə parlamentdə təmsil edilən siyasi partiyaların liderləri çıxış edərək ölkədə bir daha hərbi çevrilişə cəhd edilməməsi üçün milli birlik və bərabərliyə çağırışlar edərək demokratiyanın dərinləşdirilməsinin lüzumunu vurğulayıblar.

FETÖ-nün 15 iyul 2016-cı hərbi çevrilişə cəhdində 251 nəfər hərbçi və mülki vətəndaş həlak olub. Hökumətin qərarıyla həlak olanlara şəhid statusu verilib. Fətullahçı terror təşkilatının Türkiyə dövlətinin bütün strukturlarından təmizlənməsi məqsədiylə aparılan genişmiqyaslı təhqiqat və istintaqlar bu gün də fasiləsiz şəkildə davam etdirilir.