Yazıçı həmkarının əsərini plagiat edən Elif Şafak məhkəmə tərəfindən cəzalandırıldı

İstanbuldakı Anadolu Birinci Fikir və Patent Hüquq Məhkəməsi Elif Şafakın `Bit sarayı` romanının Mine Kırıkkanatın `Milçək sarayı` romanından plagiat olduğuna dair hökm çıxarmışdır. Məhkəmənin təyin etdiyi 3 nəfərdən ibarət Mütəxəssislər heyəti  2002-ci ildə çap edilən `Bit sarayı` romanının 1990-cı ildə çap edilən `Milçək sarayı` romanından plagiat olduğunu 44 maddədən ibarət `Səbəblər` bölməsində  geniş şəkildə ifadə etmişdir. Məhkəmənin hökmünün elan edilməsindən sonra ictimaiyyətə müraciət imzalayan bir qrup Türk yazıçısı mübahisəli məsələlərin məhkəmələrdə yox,qələm sahiblərinin öz aralarında həll edilməsinin lüzumuna diqqəti cəlb etmişlər. Məsələ ilə bağlı Turan İnformasiya Agentliyinə açıqlama verən müasir Türk nəsrinin dünya miqyasında tanınmış nümayəndəsi Mine Kırıkkanat deyib:

“İki alim oxucum Türkiyədə və dünyada FETÖ-nün dəstəyi ilə tanıdılan Elif Şafakın mənim romanımdan plagiat etməsinə dair xəbərdarlıq edənə qədər  onun heç bir romanını oxumamışdım. Ona görə məhkəmə iddiası qaldırmaqda gecikmişdim. Ancaq gecikməyim yaxşı oldu, çünki bu iddiamı FETÖ-nün Türk ədliyyəsinə hakim olduğu dönəmlərdə qaldırsaydım, FETÖ-çü hakimlər heç bir addım atmayacaqdı. Əslində 2002-ci ildə Elif Şafak-ın mənim kitabımdan hər şeyi oğurlaması onun arxasında duran FETÖ-nün o vaxtkı gücündən irəli gəlirdi. Mənim 189 səhifədən ibarət kitabımı söz yığınıyla böyüdərək 400 səhifəyə çatdırıb. Ancaq həqiqlətlər bir gün mütləq ortaya çıxır. Anadolu Birinci Fikir və Patent Hüquq Məhkəməsinin çıxardığı hökm appelyasiyadan sonra qətiləşsə, kitab bazarındakı `Bit sarayı`nın nəşrləri mağazalardan yığışdırılacaq, kitab yenidən nəşr edilə bilməyəcək və məhkəməni uduzan `Doğan Kitapçılık` nəşriyyatı ilə Elif Şafak ən yüksək tirajlı 3 qəzetdən birində məsrəfini özləri ödəyərək məhkəmənin çıxardığı plagiat hökmünü çap etdirmək məcburiyyətində qalacaqlar. Bundan başqa mənə mənəvi təzminat ödyəcəklər”

Türkiyə məhkəmələri plagiat məsələləriylə bağlı  Qərb ölkələrində olduğu kimi mütəxəssislərdən ibarət heyətlərin raportlarına əsaslanaraq hökm çıxarırlar. Mine Kırıkkanat-ın plagiatdan şikayətçi olduğu məhkəmə də hökm 3 mütəxəssisdən ibarət qrupun 44 maddədən ibarət rəyinə əsaslanılaraq çıxarmışdır. Elif Şafak-ın romanını çap edən `Doğan Kitapçılık` nəşriyyatının və yazıçının özünün Appelyasiya Məhkəməsinə müraciət etməsinə dair, hələ ki, ictimaiyyətə verilmiş bir açıqlama yoxdur. Hökmün qüvvədə qalması bir nasir kimi Elif Şafak-ın taleyinə neqativ təsir göstərə bilər.