2014-cü ildə sement nəhənginin səhmlərinin gəlirliliyi 62% olub

Martın 12-də Holcim (Azərbaycan) ASC səhmdarlarının ümumi yığıncağı 2014-cü ilin mənfəətinin bölünməsi barədə qərar qəbul edib. Səhmdarlar ikinci dəfə yüksək dividend əldə edəcək.

Bir qayda olaraq ölkənin ən böyük özəl müəssisəsi olan Qaradağ Sement Zavodu maliyyə hesabatını KİV-də açıqlamır və səhmdarlarının ümumi yığıncağının nəticələri barədə qanunvericiliyə uyğun informasiya vermir. Şirkət maliyyə hesabatını saytında yerləşdirir. Ona görə minoritar səhmdarlardan informasiya almaq lazım gəlir. Onların birinin verdiyi məlumata görə, Holcim (Azərbaycan) ASC-nin gəlirləri 134 mln manat, mənfəəti 78 mln 57,1 min manat olub. Dividend ödənişinə 19 mln manat yönəldilir. Bir səhmə 12,48 manat hesablanır və 2 mərhələdə ödəniləcək. Bu, nominalın (20 manat) 62%-dir. Səhmlərin bazar qiyməti 85 manata yaxındır.  

Holcim (Azərbaycan) ölkədə dividend verən çox az şirkətlərdəndir. 2013-cü ildə onun səhmdarları bir səhmə görə 32,5 manat alıb.  2009-cu ilin II rübündən müəssisə xalis mənfəəti beynəlxalq maliyyə institutlarından aldığı kreditlərin ödənilməsinə yönəldib.

Şirkətin səhm nəzarət paketi Holcim Ltd-yə (İsveçrə) məxsusdur. AYİB və Azərbaycan İnvestisiya Şirkəti 10% səhmə malikdir. Qalan səhmlər belə bölünüb:  Holcim  Auslandbeteiligungs GmbH - 3%, “Azer İnvest Kompani”  2% və “Çelsi kapital” -0,02%. Fiziki şəxslər (600 nəfər) 9% səhmə malikdir. Hər fiziki şəxsin 186 səhmi var.

Holcim (Azərbaycan) 1998-ci ildə Qaradağ Sement Zavodunun bazasında yaradılıb. Nizamnamə kapitalı 31 mln manatdır. 08B