Vergilər Nazirliyi fevral ayında yığılan vergilərlə bağlı məlumatları gizlədib

2009-cu ildən bəri ilk dəfə olaraq Vergilər Nazirliyi bu ilin yanvar-fevral aylarında yığılan vergilərlə bağlı məlumatı gizlədib və yalnız proqnozun 103,2% yerinə yetirildiyini göstərməklə kifayətlənib. Ekspertlər bunu neft sektoruna dair proqnozların yerinə yetirilməməsi ilə əlaqələndirir. Belə ki, iki ayda ARDNŞ-nin vergi ödəmələri 120 mln manat azalıb.

Bu ilin yanvar ayında Vergilər Nazirliyinin xətti ilə dövlət büdcəsinə 685,9 mln manatın ödənilməsi təmin edilib. Bu, bir il əvvəlkindən 94 mln 452,8 min manat azdır. Güman ki, fevralda da vergi yığanlar 2014-cü ilin eyni dövrünün səviyyəsinə çatmayıb.

Vergilər Nazirliyi yalnız dövlət büdcəsinə 666 mln 635,9 min manat toplayan qeyri-neft sektoruna dair məlumatları təqdim edib. Bu rəqəm ötən ilin analoji dövründən 7,8% çoxdur.

Xatırladaq ki, 2014-cü ilin ilk iki ayı ərzində Vergilər Nazirliyi dövlər büdcəsinə 1 mlrd 233,6 mln manatın yığılmasını təmin edib.

İqtisadçı Rövşən Ağayev Turan-a bildirib ki, “Büdcə sistemi haqqında” qanunda fiskal strukturların büdcə ödənişləri üzrə proqnoz öhdəliklərinin yerinə yetirilməsi ilə bağlı aylıq hesabatllılıq tələbi yoxdu.

Həmçinin Maliyyə Nazirliyi tərəfindən dövlət büdcəsinin gəlir və xərc hissəsinin təmin edilməsinə dair aylıq hərtərəfli hesabatlılıqla bağlı tələblər də yoxdur. Məsələn, Rusiya və Qazaxıstan kimi neft ölkələrində iki ayda  dövlət büdcəsinin yerinə yetirilməsi ilə bağlı məlumat artıq açıqlanıb. Azərbaycanda hətta yanvarın göstəriciləri açıqlanmayıb. Ağayev qeyd edib ki, bu, cəmiyyətdə müəyyən narahatçılığa səbəb olur.

Qeyd edək ki, bu il Vergilər Nazirliyinin dövlət büdcəsinə vergi və dövlət rüsumlarının təmin edilməsi planı 7 mlrd 112 mln manat səviyyəsindədir. Bu, 2014-cü ildəkindən 10 mln manat çoxdur. 08D